Замын хөдөлгөөний аюулгүй байдлын тухай хууль хүчин төгөлдөр мөрдөгдөж эхлээд дөрвөн сарын хугацаа өнгөрч байна. Уг хуулийн 8.3-т Замын хөдөлгөөн зохицуулах, хянан шалгах болон бэлэн бус хэлбэрээр торгууль оногдуулах, зөрчлийн бүртгэлийн оноо тооцох журмыг хууль зүйн асуудал эрхэлсэн Засгийн газрын гишүүн батална гэж заасны дагуу Хууль зүйн сайдын 2015 оны наймдугаар сарын 28-ны өдрийн А-187 тоот “Жолооч нарын зөрчлийн оноо тооцох журам” батлагдсан.

Энэхүү журмыг 2016 оны нэгдүгээр сарын 1-ний өдрөөс эхлэн хэрэгжиж байгаа тухай мэдээлэл зарим хэвлэл мэдээллийн хэрэгсэл, олон нийтийн хуудсаар цацагдаж байна. Тэгвэл Жолооч нарын зөрчлийн оноо тооцох журам хэрэгжээгүй, ирэх сараас хэрэгжиж эхлэхийг албаны хүмүүс мэдээллээ. Жолоочийн зөрчлийн оноог хэрхэн хасах, яаж сэргээх зэрэгт албаны хүмүүсийн тайлбар, мэдээллийг хүргэе.

Ирэх сарын 1-ээс зөрчлийн оноог тооцно

Улаанбаатар хотын Замын цагдаагийн газрын Урьдчилан сэргийлэх хэлтсийн дарга, цагдаагийн хурандаа Э.Бөхбат

Замын хөдөлгөөний аюулгүй байдлын тухай хуулийг дагаж гарах 26 журмын нэг нь Жолоочийн зөрчлийн оноо тооцох систем. Энэхүү журмын хэрэгжүүлэхийн тулд техник технологийн нэлээн шинэчлэл хийгдэж байгаа учир одоогоор хэрэгжиж эхлээгүй байна. Жолоочийн бүртгэлийн системд орж буй жолооч бүр 10 оноотой байна. Түүнээс зөрчлийн төрлөөс хамаарч 1-5 оноог хасна. Мөн оноо сэргээгдэх урамшууллын нөхцөл ч бий.

Тухайлбал,  нэг жолооч зам тээврйин осол гаргаж 5 оноо хасуулсан гэвэл тухайн жолооч тэр жилдээ замын хөдөлгөөний журмын зүйл заалт, ямар нэгэн журам зөрчихгүй бол хасуулсан оноо нь сэргээгдэнэ.

Мөн жолооч онооноосоо хасуулсаар 1 оноотой үлдчихсэн байя гэж бодъё. Тэрбээр замын хөдөлгөөний дүрэм зөрчихгүйгээр хоёр жилийн хугацаанд замын хөдөлгөөнд оролцвол буцаагаад 10 оноо нь сэргээгдэнэ.

Угаасаа онооны системийн эцсийн зорилго нь сахилгагүй, соёлгүй, дүрэмгүй жолооч нарын сахилгыг дээшлүүлэх.

Өнгөрөгч есдүгээр сарын 1-ээс хойш буюу Замын хөдөлгөөний аюулгүй байдлын тухай хууль хэрэгжиж эхэлснээр нөхцөл байдал өмнөхөөс эрс дээрдсэн байна. зам тээврийн ослоор амь насаа алдсан иргэдийн тоо 17, гэмтсэн хүний тоо 18 хувиар буурсан статистик тоо баримт гарсан.  Монгол хүний амь нас аврагдаж байна.

Замын хөдөлгөөний аюулгүй байдлын тухай хууль, Замын хөдөлгөөний дүрмийн 80-аад зөрчил байгаа. Тэдгээрийн зөвхөн 17 зөрчлийг онооны системд оруулж өгсөн. Эдгээр нь зөрчил зам тээврийн осолд хүргэдэг. Энийг “Бид зөрчинө хурд хэтрүүлнэ. Та нар намайг зөвхөн торгох л ётой” гэсэн ойлголттой байгаа бүлэг хүмүүс эсэргүүцээд байгаа юм. Уул нь монгол хүний амь насыг аврах гэж л ийм зүйл хийж байгаа юм. Ерөөсөө зөрчихгүй л бол эдгээрт хамаарахгүй шүү дээ

Жолоочийн зөрчлийн бүртгэлийн онооны системийг 2016 оны хоёрдугаар сарын 1-ээс хэрэгжүүлэхээр төлөвлөсөн.

Жолоочийн бүртгэлийн оноог хэрхэн сэргээх вэ

Цагдаагийн Ерөнхий газрын Лицензийн төвийн дэд дарга, цагдаагийн дэд хурандаа П.Эрдэнэбат

Хууль зүйн сайдынг тушаалаар тээврийн хэрэгсэл жолоодох эрх дуусгавар болох, эрхийг сэргээх журмыг баталсан. Жолоочийн зөрчлийн бүртгэлийн оноо тооцох журмын 1.4-т Зөрчлийн оноо дууссан болон эрх хасагдсан жолооч зохих журмын дагуу сургалтад хамрагдаж, шалгалтад тэнцсэн тохиолдолд 10 оноог олгоно гэж заасан байгаа.  

Мөн журмын 3.4-т Зөрчлийн бүртгэлийн оноог хасуулсан жолооч хүсэлт гаргаж зохих журмын дагуу сургалтад хамрагдаж тэнцсэн тохиолдолд зөрчлийн бүртгэлийн 10 оног сэргээн олгож болно гэсэн заалттай.

Тээврийн хэрэгсэл жолоодох эрх дуусгавар болох, тээврийн хэрэгсэл жолоодох эрхийг сэргээх журмын  3.1.1-т заасны дагуу зөрчлийн оноо дууссан /согтуугаар тээврийн хэрэгсэл жолоодсон/-оос бусад байдлаар эрхээ хасуулсан жолооч хоёр цагийн сургалтад,

ЗХАБТХ-ийн 27 зүйлд заасны дагуу согтуугаар тээврийн хэрэгсэл жолоодож, тээврийн хэрэгсэл жолоодох эрхээ хасуулсан жолооч зургаан цагийн сургалтад хамрагдаад замын хөдөлгөөний хууль дүрмийн шалгалт өгч тэнцсэн тохиолдод жолоодох эрхийг сэргээх, жолоочийн бүртгэлийн 10 оноог олгох журамтай.

Энэ журамд заасны дагуу сургалт, шалгалтыг нийслэлд  ЦЕГ-ын Лицензийн төв, орон нутагт тухайн нутаг дэвсгэрийн цагдаагийн байгууллага хариуцсан гүйцэтгэнэ. Лицензийн төвд сургалтын танхмыг 16-нд нээсэн. Эрх сэргээхэд хууль дүрмийн шалгалтыг цахимаар авна. Шалгуулагч програмд нэвтэрч шалгалтаа өгөөд шалтгалын дүн шууд гарна. Тэнцсэн тохиолдолд эрхийг сэргээж, оноог олгох юм.

Зөрчлийн мэдээллийг жолооч нарт гар утсаар дамжуулж өгөхөөр төлөвлөж байна

-Оноо хасуулчихаад шалгалт өгч оноогоо авна гэлээ. Үүнд тооны хязгаар байгаа уу?

-Байхгүй. Дээр нь журмын  3.4-т тухай жолооч оноогоо хасуулаад дуусаагүй боловч өөрөө хүсэлт гаргасан тохиолдолд хоёр цагийн сургалтад хамрагдаад оноогоо гүйцээж авч болно гэсэн заасан байгаа. Тэгэхээр энэ  журмын дагуу явах боломжтой.

-Шалгалтдаа тэнцэхгүй хэдэн ч удаа шалгалт өгч болно гэсэн үг үү?

-Хэдэн ч удаа шалгалт өгч болно. Хамгийн гол нь замын хөдлөгөөний  хууль дүрмээ сайн мэддэг байх ёстой.

-10 оноо дуусвал жолооны үнэмлэх устах уу?

-Оноо дууссан тохиолдолд тухайн хүний жолоодох эрх хүчингүй болно. Үнэмлэх эзэндээ байна. Автоматаар эрх хасагдаж, замын хөдөлгөөнд оролцох эрхгүй болно гэсэн үг.

-Ямар зөрчлөөр хэдэн оноо хасуулснаа иргэд хэрхэн мэдэх вэ?

-Энэ тухай мэдээлэл жолоочид өөрт нь очно. Жолооч нарт тэр тухай мэдээллийг утсаар нь дамжуулж хүргэхээр судалж байна. Техник технологийн нэлээн нүсэр ажил явагдаж байна.  

-Жолооч нар өдөртөө эрхээ сэргээх боломжтой юу?

-Боломжтой. Өглөө 10:00 цагт сургалтад суугаад 15:00 цагт шалгалтаа өгөөд тэнцсэн тохиолдолд эрхээ сэргээх боломжтой.

-Жолооны эрх сэргээх шалгалтад нэг удаа хэдэн хүн хамрагдах боломжтой вэ?

-Нэг удаад 40 хүн хамрагдах боломжтой.

-Сургалт үнэ төлбөртэй юу?

-ЦЕГ-ын Лицензийн төв сургалтыг чанартай, үр дүнтэй явуулахын тулд “Хатан-Эрдэнэ” ТББ-тай гэрээ байгуулж, “Тэгш зам” төслийг хамтран хэрэгжүүлж байгаа. Тус ТББ-аас сургалтыг явуулна. Зохих хэмжээний төлбөртэй байна байх. Үнэ төлбөрийн хэмжээг тус байгууллага тогтооно. Лицензийн төвийн хувьд шалгалт авах, эрх сэргээх, үнэмлэх олгох асуудлыг манай төв зохион байгуулж байгаа. Шинээр үнэмлэх олгох тохиолдолд жолоочийн үнэмлэхийн үнэ 12.500 төгрөг тушаах ёстой.

Б.Буд