Далай ламтай уулзсныхаа төлөө дуучин Леди Гага хятадуудын дургүйцлийг хүргэсэн билээ. Уг уулзалтын дараа хятадууд дуучин бүсгүйг БНХАУ-д тоглолтоо хийх болон аяллаар ирэхийг хатуу хориглох хэрэгтэй хэмээн эрх баригчдаасаа шаардаж эхэлсэн. Хятадын интернэт хэрэглэгчид мөн дуучны бүх дууг Хятадад гарахыг хориглохыг шаардаж “Гагагийн дууг хоригло” гэх аян хүртэл зохион байгуулжээ.

Дуучин Гага “Далай ламтай уулзсан нь хувь хүний асуудал, заавал хүмүүсээс уучлалт гуйх шаардлаггүй” хэмээн хэлсэн талаар “TMZ” сайт ярьсан байна. Гага твиттертээ “Хүмүүс яагаад намайг үзэн ядаад байгааг мэдэхгүй. Би их гайхаж байна” гэж жиргэжээ.

Далай ламтай уулзах үеэрээ Гага Түвдийн тусгаар тогтнолыг олон улс хүлээн зөвшөөрөх хүртэл сошиал ертөнцөөр аян зохион байгуулахаа амласан нь хятадуудын бухимдлыг төрүүлсэн билээ. Гэхдээ Гагагийн асуудлаар БНХАУ-ын эрх баригчид ямар нэгэн мэдэгдэл хийгээгүй байна.

Б.Дэлгэрцэцэг