“Монре транс" компанийн урилгаар ОХУ-ын “Московский Дельфинарий” явуулын циркийн амьтан болон сургагч нар Улаанбаатар хотод иржээ. Тус циркийн “Далайн амьтдын тоглолт” Үндэсний соёл амралтын хүрээлэнд өчигдөр нээлтээ хийлээ.

Явуулын циркийн баг Москва хотоос хоёр сар гаруйн өмнө  гарсан бөгөөд Эрхүүд тоглолтоо хийгээд Монгол улсыг зорин ирсэн нь энэ аж. Манай улсад сарын хугацаанд байрлаж Дельфиний тоглолтыг зохион байгуулах юм байна. Тоглолт нь 500 хүний суудалтай явуулын угсардаг бассейнд долоо хоногт есөн удаа зохион байгуулах бөгөөд лхагва, пүрэв, баасан гарагт 18:00, бямба, ням  гарагт 12:00, 15:00, 18:00 цагт тус тус тоглоно. Тоглолтын тасалбар суудлаасаа хамаарч 15-30 мянган төгрөгийн үнэтэй бөгөөд гурав хүртэлх насны хүүхэд төрсний гэрчилгээгээ авч очоод үнэгүй үзэх боломжтой гэдгийг зохион байгуулагчид хэлж байна.

Сонирхуулахад “Московский Дельфинарий” амьтны хүрээлэнгийн гурван дельфин Монголд ирсэн байгаа аж.

Г.Тэгшсүрэн