“Хар сарнай” хамтлагийн дуучин С.Амармандах  энэ сарын 22-нд ОХУ-ын дипломат ажилтанд зодуулсан хэрэг гарсан. Тэрбээр өдгөө ГССҮТ-д эмчлүүлж байна.  Болсон хэрэг явдлын талаар тэрбээр хэвлэлд ярилцлага өгчээ.

Дуучин С.Амармандах “Би “Аз жаргалтай Улаанбаатар” арга хэмжээн дээр урилгаар очиж ая дуугаа өргөсөн. Дуугаа дуулчихаад гарч явах үед гадаадын иргэн гэнэт араас хүнд төмрөөр цохисон. Улмаар би ухаан алдан унаж, эмнэлэгт хүргэгдсэн.  Миний биед халдсан этгээдийг би танихгүй, нэрийг нь ч мэдэхгүй. Түүн дээр очиж асуудал үүсгээгүй, бид муудалцаагүй. Уригдаж ирсэн зочид дунд гадаад иргэн байгаа ч огт мэдээгүй” хэмээв.

Мөн зарим хэвлэлээр С.Амармандах хэрэг үйлдсэн этгээдийг “Хөөе гитлер” хэмээн дуудаж асуудал үүсгэсэн гэх мэдээ гараад буй. Үүнд тэрбээр “Би огт тийм үг хэлээгүй. Намайг их муухай гүтгэж байна.  Сэтгэл зүрх өвдөж байна. Хас тэмдэгтэй дээл өмссөн байсан нь үнэн. Хас хээ маань таван мянган жилийн түүхтэй. Өвөг дээдэс минь энэ тэмдгийг шүтэж ирсэн. Мөн 300 сая төгрөг нэхэмжилсэн гэх мэдээ гарсан байна. Би гомдож байна. Өөрийн эрүүл мэндээ өөрөө ч мэдэхгүй уруул оёдолтой, бага тархи доргисон байдалтай хүнд хэцүү байх үед миний зовлонгоор зарим хүн шоу хийж байгаад харамсаж байна. Мөнгө нэхсэн зүйл байхгүй” хэмээн тайлбарлалаа.

Түүнчлэн арга хэмжээнд уригдаж ирсэн хотын удирдлагууд хэрэг явдалд буруугүй. Тэднийг энэ хэрэгт татан оролцуулах гэж байна гэдэг худлаа. Мөн зөвхөн хоёр хүний хооронд болсон үйл явдлаас болж Орос, Монгол ахан дүүсийн найрамдал харилцаа ганхах ёсгүй. Цаашид ч хоёр орны харилцаа сайхан байгаасай гэж хүсэж буйгаа илэрхийлжээ.

Тэрбээр 5 хоногийн турш ухаангүй хэвтсэн аж. Өдгөө биеийн байдал нь харьцангуй сайжирсан ч тархинд нь цус хурсан учраас эмнэлгээс гарах болоогүй байгаа юм байна.

Бичлэгийг бүтнээр нь  ЭНД  дарж үзнэ үү

Г.Тэгшсүрэн