Үндэсний эрх чөлөө, тусгаар тогтнолоо сэргээн мандуулсны 105 жилийн ойг тохиолдуулан Монгол Улсын Ерөнхийлөгч Ц.Элбэгдорж өнөөдөр ажил, хөдөлмөрөөрөө тэргүүлсэн хүмүүст төрийн дээд одон медаль гардууллаа. Монгол Улсын Гавьяат жүжигчин цол хүртсэн жүжигчин У.Батбаатартай баярын сэтгэгдлийг нь хуваалцлаа.

-Юуны өмнө танд халуун баяр хүргэе.

-Баярлалаа. Өнөөдөр Монгол Улсын ерөнхийлөгчөөс МУГЖ гэх эрхэм цолыг хүртсэндээ маш их баяртай байна. Юуны түрүүнд би аав, ээждээ баярлалаа гэж хэлмээр байна. Би монголын урлагт 35 жил зүтгэжээ.  Тэгэхээр намайг урлагт хөтөлж оруулсан багш нартаа баярлалаа. Миний уран бүтээлийг үзэж, үнэлэлт дүгнэлт өгдөг үзэгч, олон түмэн та бүхэнд маш их баярлаж явдаг шүү гэж хэлмээр байна.

-Монголын урлагт хийж бүтээснээ энэ цаг дор эргэн дурсвал?

-Би нийтдээ тайзны 50 гаруй жүжиг, 100 гаруй кинонд тоглосон байна. Дүр бүтээсэн уран бүтээлээ би сайн, муу гэж ялгадаггүй. Надаар дамжин гарсан бүхий л дүрдээ би хайртай.

-Олон нийт таныг гавьяат болохыг удаан хүлээлээ дээ хэмээж байна?

-Тийм байна билээ. Өчигдөр гэхэд фэйсбүүк дээр маань маш олон баярын, талархлын үгс ирсэн. Би маш их баярласан. Үнэндээ би ард түмэн намайг гавьяат боллоо гэхэд яаж хүлээж авах бол, юу гэж бичих бол гэж битүүхэндээ эмээж байсан. Гэтэл тэр олон хүмүүсийн талархлын үгийг хараад маш их сэтгэл ханасан. Тиймдээ ч өнөөдөр нүүр улайхгүй энэ цолыг авч байна даа.

-Та МУГЖ цолны буухиаг хэнийг үргэлжлүүлээсэй гэж хүсэж байна вэ?

-Шуудхан хэлэхэд би өөрийн анд, найз СТА жүжигчин Г.Золбоотыг МУГЖ цол тэмдгээр энгэрээ мялаагаасай гэж хүсэж байна.

Г.Тэгшсүрэн