Үндэсний циркийн 3 жүжигчин ослоор нас баржээ

Булган аймгийн Рашаант сумын нутагт энэ сарын 19-нд зам тээврийн осол гарч гурван хүний амь нас хохирчээ. Амь нас хохирсон иргэд Монголын үндэсний циркийн алиалагч, илбэчин байв.
Тодруулбал тус сумын “Тээг толгой” гэх газрын асфальтан замд амины T.Estima маркийн автомашины жолооч Б нь “Daewoo Ultranovus” маркийн М жолоочтой автомашин, амины Lexus 570 маркийн С жолоочтой автомашинуудтай мөргөлджээ.
Ослын улмаас Монголын үндэсний циркийн 2016 оны шилдэг алиалагч МУСТА Н.Баасан, илбэчин МУСТА М.Гантулга, /“Авъяаслаг Монголчууд-2015” шоуны оролцогч/, 2016 оны шилдэг жонглёрчин МУСТА Б.Идэр нар зуурдаар нас барсан байна.
Тэд орон нутагт хувийн ажлаар явж байх үедээ авто осолд орсон тухай Үндэсний циркээс мэдээллээ.
Талийгаачдын ар гэр, төрөл төрөгсдөд гүн эмгэнэл илэрхийлье. Ум сайн амгалан болтугай.
Г.Тэгшсүрэн
СЭТГЭГДЭЛ БИЧИХ