Оюутолгой компанийн ханган нийлүүлэгчдийн форум нээгдлээ. Тус форумд компанийн удирдлагууд болон ханган нийлүүлэгч 675 компанийн төлөөлөл нийлсэн 1200 төлөөлөгч  оролцож байна.

Форумыг Оюу толгой ХХК-ийн Гадаад харилцаа, олон нийттэй харилцах хэлтсийн Ерөнхий менежер Л.Оргил нээж үг хэлэв. Тэрбээр:

Өнөөдөр “Оюу толгой”-н хувьд чухал өдөр. Өнөөдөр бид өнгөрсөн жилүүдийн ололт амжилтаа дүгнэн бататгаж, ирэх жилүүдийн өндөр босгоо тогтоох онцгой цаг хугацаа юм. Хэдий миний бие “Оюу толгой”-д ажиллаж эхлээд удаагүй боловч Монгол Улсын иргэний хувиар миний сэтгэл зүрхэнд “Оюу толгой” төсөл томоохон орон зай эзлэх болоод уджээ. Монгол Улсын гадаад харилцааны салбарт хүчин зүтгэсэн сүүлийн 20 гаруй жил, Монгол Улсын хөгжил дэвшил, бүтээн байгуулалтыг “Оюу толгой”-гоор төлөөлүүлдгийг харж, мэдэрч ирсэн. Монгол Улсаа гадаадад төлөөлөн сууж байсан элчин сайдын хувиар, “Оюу толгой” компаниас Монгол Улсаа төлөөлөн дэлхийн тавцанд гарч ирэхийг ойроос ажиглан харах завшаан тохиосон. Өнөөдөр, энэхүү компанийн нэг хэсэг болж, ‘аюулгүй ажиллагааг эрхэмлэж, дэлхийд өрсөлдөхүйц зэсийн үйлдвэрлэлийг цогцлоож, Монгол улсын хөгжил дэвшилд хувь нэмэр оруулах’ эрхэм зорилгыг хэрэгжүүлэхэд гар бие оролцох болсондоо баяртай байна гэв. 

В.Бат