Одоогоос сар гаруйхны өмнө Засгийн газраас “Авто бензиний үнэ нэмэгдэхгүй” гэх мэдээллийг өгч байв. Энэ тухай Уул уурхай, хүнд үйлдвэрийн сайд Ц.Дашдорж “Засгийн газрын хуралдаанаар бензиний онцгой албан татварыг тонн тутамд 100 000 төгрөгөөр буурууллаа. Нефтийн жижиглэнгийн үнийг хөдөлгөхгүй байх үүднээс Засгийн газар өөрийн эрх мэдлийн хүрээнд шийдвэр гаргалаа” гэсэн тайлбарыг өгч байв. Мөн ард иргэдэд очих дарамтыг Засгийн газар онцгой анхаарч, ийм арга хэмжээ авснаа дуулгасан.

Энэ бол 2016 оны 11 дүгээр сарын 30-ны өдрийн Засгийн газрын хуралдааны шийдвэр. Энэ хуралдаанаар онцгой албан татварын хэмжээг  автобензинд тонн тутамд 160 мянган төгрөг, дизелийн түлшинд 180 мянган төгрөг болгосон.

Үүнээс өмнө 2016 оны 10 дугаар сарын 5-ны өдрийн хуралдаанаараа “Автобензин, дизелийн түлшний онцгой албан татварын хэмжээг тонн тутамд 240 мянган төгрөгөөр бууруулж, автобензинд тонн тутамд 260 мянга, дизелийн түлшинд тонн тутамд 280 мянган төгрөг болгон бууруулсан.

Ингэж сарын хугацаанд Засгийн газар хоёр ч удаа тогтоол баталж, шатахууны импортлогчдын татварын ачааллаас үүрэлцсэн. Нефтийн татварыг тонн тутамд 100 мянган төгрөгөөр бууруулж, улсын төсвийн орлого 110 орчим тэрбум төгрөгөөр буурах эрсдэлийг Засгийн газар үүрсэн.

Харин өнөөдөр шатахууны үнэ 150 төгрөгөөр нэмэгдээд байна. Петровис, Шунхлай, Магнай трейд зэрэг компаниуд шатахууны үнээ нэмчихлээ. Бодит нэмэгдэл үү эсвэл үгсэн хуйвалдсан хөөсрөл үү гэдгийг салбарын яам, хяналтын байгууллагууд шалгаж байгаа гэв.

Шатахуун импортлогчид өөрсдийн хүслээр үнээ нэмдэгээрээ нэмлээ. Засгийн газар элдэв татварыг нь бууруулж эрхлүүлсэн ч, шатахуун импортлогчид давардаг зангаа энэ удаа ч тавьсангүй.

Хамгийн чухал нь шатахууны 100 төгрөгийн нэмэгдэлийг даган өсдөг өргөн хэрэглээний барааны үнийг яах вэ?! Хэн ч үнээ бууруул хэмээн үүрэгдэж, зохицуулж чадахгүй. Ам.долларын ханш, шатахууны үнээс хамааран байнгын хэлбэлзэлд байдаг өргөн хэрэглээний барааны үнэ өсөх нь гарцаагүй боллоо. Сар шинийн баяр дөхөж буй энэ өдрүүдэд иргэдийн үүрэх ачаа ийн нэмэгдлээ. Хариуцлагыг хэн үүрэх вэ?!

Засгийн газар иргэдэд очих дарамтыг багасгах үүднээс импортын татварыг бууруулсан. Харин импортлогчид татварын хөнгөлөлт эдэлсэн ч бүтээгдэхүүнийхээ үнийг нэмчихлээ. Засгийн газар  одоо ямар арга хэмжээ авах вэ? Шатахууны үнээ нэмсэн Петровис, Магнай трейд, Шунхлай компаниудад хариуцлага тооцох уу.

В.Бат