ОХУ дахь Монголын Засгийн газрын эзэмшлийн байранд нууц казино ажиллуулж байсныг илрүүлэн, шалгаж буй гэх мэдээлэл Оросын хэвлэлд гарсан. Энэ асуудлаар Гадаад харилцааны яамнаас мэдээлэл хийлээ.

Москва хотод Монгол Улсын эзэмшлийн гурван обьект байдаг аж. Тэдгээрийн нэг болох 105 дугаар байранд казино ажиллуулж байсан гэх мэдээлэл гарсан юм. Тэгвэл уг байрыг Төрийн өмчийн хорооны шийдвэрээр 2007 онд ОХУ-ын Центр Регион Стиль гэх компанид түрээсэлжээ. Түрээсийн гэрээ 10 жилийн хугацаатай бөгөөд энэ оны есдүгээр сард дуусгавар болох аж.

Гадаад харилцааны яамны Төрийн нарийн бичгийн дарга Д.Даваасүрэн “Москва хотын захиргаа, мэргэжлийн байгууллагуудын зүгээс энэ байрыг ашиглах боломжгүй гэсэн дүгнэлт гаргасан. 2005 онд гал гарч байсан учраас засч сайжруулж, инженерийн шугам сүлжээг шинэчлэх шаардлагатай гэсэн дүгнэлт гаргасан учраас манай Элчин сайдын яамны ажилтнууд болон худалдааны төлөөлөгчийн газрын албан хаагчид нүүж, байрыг чөлөөлсөн” гэх мэдээллийг өгөв.

Мөн тэрбээр дипломат статустай обьектод гарсан асуудлын талаар Элчин сайдын яаманд албан ёсоор ноот бичгээр мэдэгдэх ёстой. Одоогоор ОХУ-ны Гадаад хэргийн яамнаас албан ёсны мэдээлэл ирээгүй байна. Тиймээс сайтуудад гарсан мэдээллийг нотлогдоогүй, бодит бус гэж үзэх үндэслэлтэй гэв.

В.Бат