“Хандгайт” цогцолборт бэлтгэл хийж байсан боксын үндэсний шигшээ багийн тамирчин зодооны хэрэгт холбогдон, олон нийтийн анхаарлыг татаад байна.

ОУХМ Э.Цэндбаатар энэ сарын 18-19-нд шилжих шөнө бусдад зодуулж, машинд мөргүүлсэн байдалтай ГССҮТ-д ухаангүй хүргэгдэж ирсэн гэдгийг эх сурвалжууд мэдээлж байна.

Болсон явдлыг товч өгүүлбэл “Хандгайт” цогцолборт бэлтгэл сургуулилт хийж байсан боксын  ОУХМ Э.Цэндбаатар бэлтгэлийн байрнаасаа оргож, шигшээ багийн боксчин Х.Энх-Амарын машинаар “Улаанбаатар палас”-ын ойролцоох цэнгээний газарт ирсэн. Тус цэнгээний газарт үл таних залуустай маргалдсан ч “Хүн андуураад байна” хэмээн тайлбарлаж тэднээс зугтсан боловч “Тоёото Приус” маркийн автомашинаар мөргөж гэмтээсэн тухай Гавьяат дасгалжуулагч, улсын шигшээ багийн ахлах дасгалжуулагч Д.Батсүрэн хэвлэлд ярилцлага өгчээ.

Харин түүнийг зодож, автомашинаар мөргөсөн гэх залуус  “Бааранд нэг залуу намайг цохиж унагаад нэг бус удаа өшиглөсөн. Би түүнд зодуулсан. Тэгээд баарнаас гараад найз нараа дуудсан. Тэгтэл нөгөө залуу зугтсан. Бид араас нь хайж явтал машинд мөргүүлчихсэн байна лээ. Бид зодсоноос ийм явдал болоогүй” гэж мэдүүлэг өгчээ.

ОУХМ Э.Цэндбаатар өсөж яваа ирээдүйтэй тамирчин. Тэрбээр “Рио 2016” олимпийн наадамд оролцож шагналт тавдугаар байранд шалгарсан. Медаль хүртэж чадаагүй дээ “шатаж” монголчуудын итгэлийг нь алдчихлаа гээд камерийн өмнө уйлж зогссоныг нь та бид мэднэ.

Дараа нь боксын УАШТ-нд Риогийн олимпийн хүрэл медальт, МУГТ Д.Отгондалайтай учраас таарч 3:2 онооны харьцаагаар өрсөлдөгчөө буулган авсан. Энэ мэтчилэн тэр чансаатай тамирчин гэдгээ харуулж, тив дэлхийд эх орныхоо нэрийг хэдэнтээ дуурсгасан тамирчин. Тиймээс ч идэрхэн тамирчныг ахиад зөндөөн тэмцээн хүлээж буй.

Гэвч зодооны хэрэгтэй холбогдуулан өчигдөр Боксын үндэсний шигшээ багийнхан хуралдаж, Э.Цэндбаатар, Х.Энх-Амар, Г.Баярхүү нарыг зургаан (гуравдугаар сарын 20-ноос есдүгээр сарын 20 хүртэл) сарын хугацаагаар шигшээ багаасаа хасаж, тэмцээнд оролцох эрхийг нь түдгэлзүүлжээ. Мөн залуу тамирчин Ц.Жамъяанбат, Д.Давааням, О.Бямба-Эрдэнэ нарыг Хандгайт дахь цугларалтаас буулгасан байна.

Уг нь ОУХМ Э.Цэндбаатар, Д.Давааням нар Тайландад болох эзэн хааны цомын аварга шалгаруулах тэмцээнд оролцохоор бэлтгэлээ базааж байжээ. Зодооны хэргийн улмаас тэдний оронд О.Мөнхсайхан, Ж.Отгонжаргал нарыг явуулахаар холбооноос шийдвэрлэсэн байна.

ОУХМ Э.Цэндбаатар ГССҮТ-д хэвтэн эмчлүүлж байна. Хэргийг Баянгол дүүргийн цагдаагийн хоёрдугаар хэлтэст шалгаж байгаа юм.

Машин, зодоон, хүн мөргөсөн, мөргөөгүй гэх эсрэгцэл.   Энэ бүгдээс болон зодсон, зодуулсан гэх хоёр талын байр сууриас үзвэл “Буруу эргэлт” кино санаанд бууна. Хэн буруутайг энд шүүн, тунгаах нь илүүц биз. Залуу хүнд алдах эрх бий. Харин монголын боксын спортын залгамж халаа болох залуу тамирчны эрүүл мэнд саруул байх болтугай.

Г.Тэгшсүрэн