Бангладешийн Төвбанкнаас өнгөрсөн оны хоёрдугаар сарын эхээр гэмт этгээдүүд 81 сая доллар хулгайлсан билээ. Тэгвэл уг хэргийн ард “Хойд Солонгос бий” гэх мэдээллийг АНУ-ын эрх баригчид мэдэгдсэн тухай “www.theguardian.com” сайт мэдээллээ.

“Хойд Солонгосын эрх баригчдын захиалгаар БНХАУ-ын иргэн хакер халдлага үйлдсэн байж магадгүй” гэж АНУ-ын прокурор мэдэгджээ.

АНУ-ын Хууль зүйн яамны хэвлэлийн алба “Бангладешийн Төвбанкийг ухсан хэрэг болон өнгөрсөн 2014 онд Америкийн “Sony Pictures” кино компани руу хийсэн кибер халдлага хоёр хоорондоо холбоотой” гэж мэдээлэв.

АНУ-ын Холбооны мөрдөх товчоо 81 сая долларыг хакерууд хулгайлсан хэргийг мөрдөн шалгаж байна. Хакерууд уг мөнгийг Нью-Йорк дахь Холбооны нөөцийн банкаар дамжуулан Филиппин болон Шри-Ланк дахь данснууд руу шилжүүлж, авчээ. 

Уг хэргийн улмаас Бангладешийн Төвбанкны Ерөнхийлөгч албан тушаалаасаа огцорсон юм.  

Б.Дэлгэрцэцэг