Пак Ын Хэгийн хувь тавилан хэрхэхийг өнөөдөр шийднэ. Энэ талаар “www.newsweek.com” сайт нийтэлжээ.

Эрх мэдлээ урвуулан ашигласан, авлига авсан, төрийн нууцын зэрэгтэй материалыг найздаа үзүүлсэн хэмээн буруутгагдаж, суудлаасаа буусан Өмнөд Солонгосын Ерөнхийлөгч асан Пак Ын Хэ баривчлагдах магадлалтай байна. Пак Ын Хэг баривчлах тушаалыг прокурорууд гаргасан бөгөөд тэд шүүхийн шийдвэрийг хүлээж буй юм. Сөүлийн шүүх өнөөдөр уг асуулаар хуралдах билээ.

Прокурорууд Ерөнхийлөгчийг 13 хэрэгт буруутгаж, 15-20 жилийн ял төлөвлөж байна. Одоогоор Ганнам дахь тансаг харшдаа байгаа Пак Ын Хэ хэрвээ баригдаж, шоронд орвол ямархуу нөхцөл байдалтай байх талаар албаныхан өгүүлэв.

Пак Ын Хэ Хөх ордноос нэгэнт явж, эрх мэдлээ дараагийн хүндээ шилжүүлэн өгсөн учир өмнө нь түүнд үйлчилж байсан “тусгай хамгаалалт” хүчингүй болсон юм. Тэрбээр ял эдэлж буй бусад хоригдлуудтай ижилхэн нөхцөлд байх гэнэ. Гэхдээ түүний өрөө бусад хоригдлуудын өрөөнөөс харьцангуй том байх аж. Хоригдлуудын өрөөнд угаалгын өрөө нь цуг байдаг бол Пак Ын Хэгийн угаалгын өрөө тусдаа байхаар болжээ. Хоригдлууд нэгдсэн журмаар усанд ордог бол Пак Ын Хэгийн өрөөнд шүршүүр мөн байх гэнэ. “Өрөөнөөс бусад зүйлс яг ижилхэн” хэмээн албаныхан өгүүлж байна.

Тун удахгүй Пак Ын Хэ тансаг харшдаа үлдэх үү эсвэл шоронд орох эсэх нь тодорхой болно. Мэдээж хэрэг тэрбээр уснаас цэвэр гарахын тулд бүхий л бололцоогоо ашиглана. Ард түмнийхээ итгэлийг хөсөрдүүлсэн Ерөнхийлөгчөө шоронд оруулахын тулд хууль хяналтынхан “гарцаагүй нотолгоо” олохын тулд өдөр, шөнөгүй ажиллаж байна.

Пак Ын Хэ өнгөрсөн долоо хоногт өөрийн хүсэлтээр прокуроруудад байцаалт өгсөн. Уг байцаалт 14 цаг үргэлжилсэн билээ. Тэрбээр өөрийгөө “ямар ч буруугүй” хэмээн мэдэгдэж, Чой Сун Шилийг зөвхөн хувийн зөвлөгөө өгсөн гэв.

Шүүх шийдвэрээ гаргавал тэрбээр эхний ээлжинд 20 өдөр хоригдоно. Энэ хугацаанд шүүх дахин хуралдаж түүнийгхэдэн жил хорихыг эцсийн байдлаар шийднэ. Тэрбээр бусад хоригдлын адил өглөө 6.30 цагт сэрж, 21.00 цагт унтах аж. Өдрийн цагаар албадан хөдөлмөр хийхээс гадна зөвхөн Хууль зүйн яамнаас зөвшөөрсөн дүрс бичлэгийг телевизээр үзэх боломжтой. Тэрбээр өмгөөлөгчтэйгээ хүссэн үедээ уулзаж болох гэнэ. Харин шоронгийн журмын дагуу өдөрт нэгээс илүү хүнтэй уулзах боломжгүй аж.

Тус улсын шорон болон саатуулах байруудад хоригдож буй хүмүүс өдөрт 2500 калори илчлэгтэй хоол иддэг байна. Хэрвээ шүүх өнөөдөр шийдвэрээ гаргаж Пак Ын Хэ маргаашнаас хоригдож эхэлвэл түүний шоронд идэх анхны хоол нь амталсан будаа, кимчи, байцааны шөл, далайн байцаа байх гэнэ. Эдгээр хоолны нийт үнэ нь 1443 вон буюу 1.3 доллар аж. Хоригдож буй хоригдлуудын үсийг засдаг. Шоронгийн үсчид үс тайрахаас өөр үйлчилгээ үзүүлдэггүй байна. Нийслэл Сөүл хотноо таван саатуулах байр байдаг бөгөөд энэ байруудын нэгт тэрбээр хоригдох юм.

Найзынхаа нэр хүндийн ашиглан томоохон компаниудаас авлига авсан Чой Сун Шил нэлээдгүй хугацааг шоронд өнгөруулж буй билээ. Түүнийг “Самсунг” компаниас 40 орчим сая долларыг авсан хэмээн буруутгаж байна.

Б.Дэлгэрцэцэг