Малайзад байхдаа бусдад хорлогдож амиа алдсан Хойд Солонгосын удирдагч Ким Чен Уны эцэг нэгт ах Ким Чен Намын цогцос нутаг буцсан билээ.

“Ким Чен Намын гэр бүлийнхний хүсэлтийн дагуу цогцсыг Пхеньянд хүлээлгэн өгөхөөр болсон” талаар Малайзын талаас мэдээлжээ. Цогцсыг Куала Лампураас Бээжин хотноо авчирч, дараа нь Пхеньян хотноо хүргэсэн гэнэ.

Ким Чен Намын үхлийн дараа сураггүй болоод байсан Куала Лампур хотноо суух Хойд Солонгосын Элчин сайдын гурван ажилтан нутаг буцжээ. Тэдний гэрэл зургийг орон нутгийн сэтгүүлчид авч чадсан байна. Элчин сайдын ажилчид цогцсыг дагалдан явсан аж.

Цогцсыг хойдод хүлээлгэн өгөхөөр болсны дараа тус улсад барьцаалагдаад байсан Малайзын есөн иргэн өнгөрсөн долоо хоногт эх орондоо ирсэн юм.

“Хоёр улсын дунд үүсээд буй таагүй харилцаа удахгүй дуусч магадгүй” хэмээн “AFP” агентлаг мэдээллээ.

Б.Дэлгэрцэцэг