Боксын уламжлалт Тайландын эзэн хааны цомын тэмцээн Бангкок хотноо гурав дахь үргэлжилж байна. Тэмцээнд манай улсын долоон боксчин оролцож байгаа юм.

Манай тамирчдаас эрэгтэйчүүдийн -60 кг-ын жинд тулалдаж буй  МУГТ Д.Отгондалай, -49 кг-ын жинд тулалдаж байгаа ОУХМ Г.Ган-Эрдэнэ нар хүрэл медалийн төлөөх тоглолтод өрсөлдөгчөө ялж, мөнгөн медалийн төлөө тулалдахаар болжээ.

МУГТ Д.Отгондалай Тайландын Ружакран Жунтронгыг 5:0 харьцаагаар буулган авч хүрэл медалийн болзол хангав. Харин хамгийн хөнгөн буюу 48 кг-ын жинд Г.Ган-Эрдэнэ Кубын Хорхе Алехандро Грина Мертэй тулалдаж 5:0 харьцаагаар ялалт байгууллаа. Тэд өнөөдөр мөнгөн медалийн төлөө тулалдана.

Тэмцээний 64 кг-ын жинд тулалдсан ОУХМ Б.Чинзоригийн хувьд Тайландын Вуттичай Масуктай тулалдан илт давуу тоглосон боловч ялагдал хүлээлээ. Тайландын В.Масук хөмсөг нь задарч, хоёр ч удаа эмчийн тусламж авсан байна.

Тэмцээний эхний өдөр МУГТ Д.Отгондалай, ОУХМ Г.Ган-Эрдэнэ, ОУХМ Б.Чинзориг нар өрсөлдөгчөө ялж дараагийн шатанд шалгаран үлдсэн. Харин бусад дөрвөн тамирчин өрсөлдөгчдөө ялагдан тэмцээнээ дуусгасан юм.

"Эзэн хаан-"-ы цомын тэмцээн дөрөвдүгээр сарын 2-10-нд Бангкок хотноо үргэлжилнэ. Шигшээ багийг ерөнхий дасгалжуулагч МУГД Д.Батсүрэн, Ардын багш, МУГД Д.Банди, Н.Мөнхсайхан нар удирдаж байна.

Г.Тэгшсүрэн