\

АНУ-ын иргэний агаарын тээврийн “United Airlines” компанийн ажилчид зорчигчтой бүдүүлэг харьцаж буй бичлэг твиттер хуудаснаа нийтлэгджээ. Тус компанийн онгоц Охэйрийн олон улсын нисэх буудлаас хөөрөх гэж байхад нисэх багийнхан Ази гаралтай 40 орчим насны эрийг хүч хэрэглэн онгоцноос буулгасан байна. Уг үйл явдлыг нэгэн зорчигч гар утсаараа бичиж авч, өөрийн твиттер хуудастаа нийтэлжээ.

Тус нислэгийн бүх суудал дүүрсэн байхад “United Airlines” компанийн дөрвөн ажилтан яаралтай нисэх шаардлагатай болжээ. Нисэх багийнхан ажилчдаа авч явахын тулд зарим зорчигчийг буухыг шаардаж, улмаар хүч хэрэглэсэн байна. Багийнхан Ази эр дээр очиж “Та дараагийн нислэгээр хүссэн газартаа очно уу?” гэхэд тэрбээр уг саналаас татгалзжээ. Татгалзсан хариу авсан багийнхан үйлчлүүлэгчдээ хүч хэрэглэж, онгоцноос хүчээр буулгасан аж.

Үйлчлүүлэгчтэйгээ бүдүүлэг харьцаж буй бичлэг, гэрэл зураг олон нийтийн сүлжээнд нийтлэгдсний дараахан олон мянган хүн “United Airlines” компанийг буруутгаж, тус компанийн гүйцэтгэх захирал Оскар Мюнозыг огцрохыг шаарджээ. Ази эрийг онгоцноос хүчээр буулгаж буй бичлэгийг ганцхан цагийн дотор 10 мянган хүн үзэж, 5700 орчим хүн сэтгэгдлээ үлдээсэн байна.

Үйлчлүүлэгчтэй бүдүүлэг харьцсан нисэхийн ажилчдыг сахилгын шийтгэлээр шийтгэхээ “United Airlines” компанийн удирдлагууд мэдэгдэж, нийт үйлчлүүлэгчдээсээ уучлал гуйжээ.

Б.Дэлгэрцэцэг