Ийм мэдээлэл цахим орчинд тархаж эхлээд байна. Баттай мэдээлэл биш ч урьдчилсан үзлэгээр ийм дүгнэлт гарсан бололтой. Хэргийг эргэн сануулвал, Зэвсэгт хүчний 350 дугаар ангийн алба хаагчид цэргийн хээрийн төлөвлөгөөт бэлтгэлд Тавантолгой дахь сургалтын баазад гарч байхдаа харамсалтайгаар амиа алдсан билээ.

Төлөвлөгөөт цэргийн бэлтгэлийн үеэр байлдааны гранат дэлбэрч, ахмад Б.Мөнгөншагай, ахлагч Б.Ариунболд нар амиа алдсан. Мөн найман цэрэг гранатаас үсэрсэн хэлтэрхийд өртөж их, бага хэмжээгээр шархадсан юм. Тэгвэл талийгаач Б.Мөнгөншагай гранат дэлбэрэх нь тодорхой болсон учраас өөрийн биеэр дарж хэвтэн бусад цэргүүдийнхээ амийг аварсан гэх мэдээлэл сошиал орчинд тараад байгаа юм. Энэ мэдээлэл ч үндэслэлтэй байх магадлалтай.

Хэрвээ энэ гранат ямар нэг халхавчгүйгээр шууд дэлбэрсэн бол 50-250 метрт байгаа бүх амьд биетийг устгах чадалтай гэдгийг ЗХЖШ-ын удирдлагууд мэдэгдсэн. Тиймээс өөрийн алтан амиар цэргүүдээ аварсан байх магадлал өндөр байгаа юм. Шүүхийн шинжилгээний дүгнэлт эцсийн байдлаар гараагүй байгаа.

Энэ мэдээлэл үнэн гэдэг нь батлагдвал эдгээр зоригт эрсийг Улсын баатар цолоор нэхэн шагнахад ч буруудахгүй. Б.Мөнгөншагай, Б.Ариунболд нар энхийг сахиулагчид байсан бөгөөд шаардлагатай гэвэл бусдын төлөө ч амиа өгөхөд бэлэн, эх орны цэрэг болон бэлтгэгдэж байсан. Талийгаачдын амиа алдсан явдал хэрвээ ЗХЖШ-ын удирдлага, эсвэл тэнд ажиллаж байсан удирдлагуудын буруутай үйлдлээс болсон бол Батлан хамгаалах яам хатуу хариуцлага тооцно гэдгээ ч мэдэгдээд байгаа билээ. Шүүх эмнэлгийн дүгнэлт л одоо энэ бүх эргэлзээ дагуулсан асуудлуудад хариулт өгөх учиртай.

Б.Эрхэс

Эх сурвалж: mminfo.mn