Монгол Улсын дипломат ажилтан Украйн-Унгарын хилийн Лужанка боомтоор хууль бусаар их хэмжээний тамхи нэвтрүүлэхийг завдан саатуулагдсан тухай мэдээлэл ОХУ, Украйны хэвлэл мэдээллийн хэрэгслээр /2017.04.20/ цацагдсан.

Гадаад харилцааны яамнаас Монгол Улсын О.Лхагвацэрэн гэх Д0000949 гэсэн дипломат паспорттой иргэн саатуулагдсан болохыг мэдээлсэн.

Иргэн О.Лхагвацэрэн “Энэ хэрэг надтай ямар ч холбоогүй. Цагдаагийн байгууллагад баривчлагдаж, шалгагдсан зүйл байхгүй. Би удахгүй Монголд очиж үнэн мөнийг тогтоолгох бодолтой байна. Би энгийн паспорт ашиглаж байгаа. Надад ямар ч албан  паспорт байхгүй” гэж хэвлэлд ярьжээ.

Гадаад харилцааны яамны Консулын газраас иргэн О.Лхагвацэрэн нь 2014 оны нэгдүгээр сарын 30-нд цагаатгах ажлыг удирдан зохион байгуулах ажлын нарийн бичгийн дарга гэх төрийн албан хаагч статусаар Гадаад харилцааны дипломат паспорт мэдүүлж авсан. Мөн Хил хамгаалах ерөнхий газраас  иргэний мэдээллийг лавлахад тэрбээр 2017 оны дөрөвдүгээр сарын 18-нд энгийн паспортоор Турк улсад нэвтрээд эх орондоо ирээгүй байгааг тогтоосон тухай мэдээлж байсан.

Г.Тэгшсүрэн