УИХ-ын гишүүн, Сангийн сайд Б.Чойжилсүрэн нэр төрд халдсан үндэслэлээр нэр бүхий дөрвөн сайтыг цагдаагийн байгууллагаар шалгуулж эхэлсэн тухай өмнө нь мэдээлсэн.  Энэ талаар Zindaa.mn, Breakingnews.mn,  Undesten.mn, Paparatsi.mn сайтын удирдлагууд мэдээлэл хийв. Хэвлэлийн бага хуралд Монголын сайтын холбооны Ерөнхийлөгч Э.Батхүү, Undesten.mn сайтын захирал Ц.Мөнхбаатар, Zindaa.mn, Breakingnews.mn сайтын Гүйцэтгэх захирал С.Мөнхзул нар оролцов.

“Undesten.mn” сайтын захирал Ц.Мөнхбаатар “Улстөрчид сэтгүүлчдийг дарамталж, сүрдүүлж, улмаар шүүх цагдаагаар асуудлыг шийдүүлэхийг  нэн тэргүүнд зорьдог жишиг тогтлоо. Аль нам байхаас үл хамааран сэтгүүлчийг ад үзсэн, дарамталсан шинжтэй  үйл ажиллагаа явагдах  боллоо. Гэсэн ч бид хууль цагдаагийн байгууллагын шаардлагыг хүндэтгэн үзэж, гаргасан нийтлэлээ буцаан татаж байна. " гэв.

Мөн Zindaa.mn, Breakingnews.mn сайтын сурвалжлах баг Өмнөговь аймгийн Гурван-Тэс сумын нутгийн иргэдийн хүсэлтээр “Тосон бумбын нулимс” цуврал нэвтрүүлгийг бэлтгэжээ.  Тус нэвтрүүлэг цацагдсаны дараа тодорхой дарамт шахалтууд ирсэн тухай Zindaa.mn сайтын гүйцэтгэх захирал С.Мөнхзул ярилаа.

Тэрбээр "Бид энэ эрэн сурвалжилсан нэвтрүүлгээрээ "Сауд Гоби Коэл Транс" ХХК ашиглалтын лиценз авч, уул уурхайн олборлолт явуулах гэснээс үүдэж Тооройн төгөл, Загийн ой, Буйлсын хөндийн буйлс устаж үгүй болох аюул нүүрлээд байгааг хөндсөн юм.  Харамсалтай нь нутгийн иргэдийн хүсэлтээр хийгдсэн уг нэвтрүүлгийг бэлтгэсэн сэтгүүлч, редакцид тодорхой байгууллага, албан тушаалтны зүгээс дарамт шахалт үзүүлж эхэллээ гэж үзэх үндэслэлтэй хэд хэдэн үйл явдал өнгөрсөн хугацаанд бидэнд тохиолдлоо. Бид байдлыг маш  сайн ажиглаж байгаа. Хэрвээ дахин  ноцтой нөхцөл байдал үүсвэл  бид асуудлыг олон нийтэд цаг минуттай нь, баримттай нь мэдээллэх болно" гэлээ.

Дээрхи сайтын сурвалжлах баг "Тосон Бумбын нулимс", "Тусгай хамгаалалтанд хэрчүүлсэн "Тосон Бумбын нуруу", "Хөвд , Хуршуутын голын хөөрхийлөлтэй хувь заяа" зэрэг цуврал баримтат нэвтрүүлгийг бэлтгэж, олон нийтэд түгээжээ.

Г.Тэгшсүрэн