Олон Улсын Эмэгтэйчүүдийн эрхийг хамгаалах өдрөөр  /2017.03.08/ Сүхбаатарын талбайд гурван эмэгтэй нүцгэн жагсаал хийсэн. Тэд “Оффшорчдыг зайлуул”, “Хулгайлсан хөрөнгөө буцааж өг” гэх утга бүхий лоозон барьж, нүцгэн жагсаал хийж байв.

Нүцгэн жагсаал хийсэн эмэгтэйчүүд нь “Иргэдийн шударга шүүх”  ТББ-ын дэргэдэх ээжүүдийн холбооны гишүүд аж. Тэд ирэх зургадугаар сарын 1-нд буюу Эх үрсийн баярын өдрөөр бүтэн нүцгэлж жагсаал хийхээ мэдэгдэж, мэдээлэл хийв.

“Иргэдийн шударга шүүх” ТББ-аас АН С.Баярцогтыг, МАН Ц.Нямдоржыг шүүх, цагдаагийн байгууллагаар шалгуулахыг шаардаж удаа дараа хэвлэлийн хурал хийж байсан. Нүцгэн жагсаал хийсэн эмэгтэйчүүд ч УИХ-ын дэд дарга Ц.Нямдоржид дээрхи шаардлагыг албан бичгээр хүргүүлсэн аж.

Гэвч шаардлагын хариу ирүүлээгүй тул зургадугаар сарын 1-нд дахин нүцгэн жагсаал хийх болсноо мэдэгдэв. Энэ удаад тэд бүтэн нүцгэлж жагсана гэв.

Жагсаалд 21 эмэгтэй нэгдэхээр болсон аж.

Г.Тэгшсүрэн