“Боловсрол” суваг телевиз “Эндемол шайн”  группийн албан ёсны эрхтэйгээр “Яг түүн шиг” шоуг өнгөрсөн жил Монголд анх удаа зохион байгуулсан. Тус нэвтрүүлгийн хоёрдугаар улирлын дугаар дөрөвдүгээр сарын 2-ноос эхлэн телевизийн эфирээр цацагдаж эхэлсэн. Хоёр сарын турш үргэлжилсэн тус шоу өчигдөр /2017.06.04/ өндөрлөж, ялагчаа тодрууллаа. Шоуны ялагчаар “Х түц” продакшны жүжигчин, СТА Т.Бархүү шалгарав.

Т.Бархүү есөн дугаарын гуравт нь ялалт байгуулсан бөгөөд сүүлийн шалгаруулалтад мөн шилдгээр тодорлоо.

“Яг түүн шиг 2” шоуны эхний өдрийн дугаарын ялагчаар “Х түц” продакшны жүжигчин, СТА Т.Бархүү шалгарч 3 сая төгрөгийн эзэн болсоон. Тэрбээр эхний дугаарт СТА, дуучин Т.Дэлгэрмөрөнгийн дүрд хувирч, “Наян булаг” дууг нь дуулсан юм.

Мөн тэрбээр “Никитон” хамтлагийн дуучин, Б.Батчулууун болон, Вee Gees нарын дүрд хувиран ялалт байгуулсан билээ.

Т.Бархүү ялагч болсон даруйдаа “Та нартаа маш их баярлалаа. Хэлэх үг олдоггүй юм байна.Энэ бол амьдралд тохиох ховор боломж. Ийм боломжийг олгож өгсөн “Боловсрол” телевизийнхэндээ баярлалаа. “Х-Түц” хамтлагийнхандаа баярлалаа. Энэ хорвоод намайг хүн болгож өгсөн ээж, аавдаа маш их баярлалаа. Аав минь тэнгэрийн орноос харж байгаа байх. Өнөөдөр энэхүү тайзан дээр намайг та нарт ийм гайхалтай үзүүлбэр үзүүлэхэд үргэлж дэмжиж байсан түүнд би хайртай ч зоригтоогоор хайртай гэж тийм ч олон хэлж байгаагүй байх. Надтай хамт олон шөнө энэ нэвтрүүлгийн төлөө нойргүй хоносон Одончимэгтээ хайртай шүү. Би та нарынхаа итгэлийг алдахгүй байх болно. Намайг дэмжсэн найз нөхөд, дэмжигч, шүүгч нартаа баярлалаа” хэмээн баярын сэтгэгдлээсээ хуваалцсан.

Тэрбээр  20 сая төгрөгийн эзэн болсон юм. Ингээд “Яг түүн шиг” шоу эхлэхийн өмнө түүнтэй хийсэн ярилцлагыг дахин нийтэлж байна.

Сахалтай залуугийн дүрд хувирахыг хүсч байна

-Шоунд оролцуулах саналыг хэрхэн хүлээж авав?

 -Би хошин урлагийн тоглолтон дээр зарим хүмүүсийг дуурайж элэглэлийн ноймор үзүүлж байсан удаатай. Тийм учраас миний найз нөхөд намайг энэ нэвтрүүлэгт орооч гэдэг саналыг тавьдаг байлаа. Тэгтэл хэд хоногийн өмнө энэхүү нэвтрүүлэгт орох санал ирсэн. Би маш их гайхсан. Нэвтрүүлгийг сонирхолтой болгох үүднээс намайг сонгосон болов уу гэж дотроо бодсон. Тийм учраас надад илүү харицлага оногдож байх шиг санагдаж байна.

-Өмнө нь нэвтрүүлгийн үзэж байв уу? Нэвтрүүлгийн даалгавруудыг хэрхэн биелүүлэхээр төлөвлөж байна вэ?

-Сайн уран бүтээлчийг сайн дуурайж, үзэгчдийн таашаалд нийцсэн үзүүлбэр үзүүлэхийг л зорьж байна. Хугацаа маш давчуу. Тийм учраас хэцүү л санагдаж байна. Гэхдээ хичээнэ.

-Өрсөлдөгч нарийнхаа талаар ямар бодолтой байна вэ?

-Өрсөлдөгч нараа би өмнө нь элэглэх урлагаар жүжиглэж байхыг нь хараагүй. Үнэн хэрэгтээ энэ нэвтрүүлэгт оролцож байгаа дуучдын дуулж байхыг нь харснаас биш энэ хүнээс өөр ямар авьяас, ямар хоолой гарах вэ гэдгийг төсөөлж ч чадахгүй байна. Тийм учраас эд нараас юу  л гарах бол гэхээс сонирхож, айж байна шүү.

-Найм дахь оролцогчын талаар төсөөлөл байна уу?

-Өнөөдөр найм дахь оролцогч нь тодорхой бус байгаа. Хэн байгаа нь эргэлзээтэй байгаа тэр хүнээс их айж байна.

-Танай хамтлагийн жүжигчин Н.Онон энэ жил шүүгчээр ажиллах болов уу?

-Нэвтрүүлгийн зохион байгуулагчдын зүгээс шүүгчдийн нэрийг зарлахгүй байна. Тийм болохоор хэлж мэдэхгүй юм. Манай монголчууд их харамтгай ард түмэн шүү дээ. Тиймээс Онон ах шүүгчээр ажиллавал бид хоёр хэдий нэг хамтлагт ажилладаг ч гэсэн шударга шүүнэ гэж би бодож байгаа. Бүх юм шударга байх ёстой. Угаас хэн нь хэн бэ гэдгийг тухайн өдрийн дугаар дээр үзэгчид шүүнэ. Онон ах маань харин хүмүүсийн хандлагаас болоод надад бага оноо өгчих вий гэж эмээж байгаа шүү/инээв.сур/.

-Энэ жилийн дугаарт гурван ч дуучин оролцож байна. Таны хувьд ч  урын сандаа чамгүй уран бүтээлтэй байх аа?

-Дуучны хувьд бол би өөрийгөө чамладаггүй. Дуу бичүүлж явсан үе надад бий. Тэр бол миний сонирхол, хобби байсан. Гэхдээ би дуучны карьераар явах хүн биш гэдгээ мэдрээд жүжигчний карьераа илүү хөөхөөр болсон /инээв.сур/. Тэр сайхан хүсэл зоригийг минь дэмжиж тухайн үед хамтарч ажиллаж байсан бүх хүмүүст баярласнаа илэрхийлсэн. Харин энэхүү нэвтрүүлэгт эдгээр олон сайхан уран бүтээлчидтэй хамтран оролцож байгаадаа баяртай байна. Ялангуяа манай домог болсон “Boy band” хамтлаг болох “Камертон” хамтлагийн дуучин Мээдээтэйгээ хамт орж байгаадаа маш их баяртай байна.

-Аль дуучныг дуурайвал танд илүү дөхөм байх бол?

-Би хувьдаа дуурийн дуу дуулахсан гэж хүсдэг юм. Бас жүжигчин хүний хувьд сахалтай дуучид надад таараасай гэж бодож байна. Учир нь би сахал тавьж кинонд тоглохсон, эсвэл сахалтай хүн дуурайхсан гэжбодож явдаг юм. Тиймээс нэвтрүүлгийн явцад сахалтай эрэгтэй дуучин таарвал баярлана.

Г.Тэгшсүрэн