Их Британийн нийслэл Лондон хотноо өчигдөр террорист халдлага болсон. Халдлагаар долоон хүн амиа алдаж, 48 хүн гэмтжээ.

Цагаан өнгийн ачааны машинтай бүлэг этгээдүүд Лондонгийн гүүрээр явж байсан иргэдийг дайрсан байна.  Дараа нь уг машинаас тэсрэх бөмбөг суурилуулсан хантааз өмссөн гурван этгээд бууж ирж, иргэдийг хутгалжээ.

Цагдаагийнхан халдлага үйлдсэн этгээдүүдийг устгасан бөгөөд тэдний зүүсэн хантаазанд ямар нэгэн тэсрэх төхөөрөмж байгаагүй талаар мэдээлэв. Тэд халдлага үйлдэхдээ “Аллахын төлөө” хэмээн хашгирч байжээ.

Тэгвэл халдлагын хариуцлагыг Иракийн хэт даврагч “Халифатын вант улс” бүлэглэл үйлдсэн тухайгаа өөрсдийн Амак мэдээллийн хэрэгслээрээ дамжуулан мэдэгдлээ. Мөн тус бүлэглэл Ариун Рамадан баярын үеэр дахин халдлага үйлдэхээ мэдэгдэж, дэлхийн өнцөг булан бүрт байгаа террористуудад Аллахад үнэнчээ батлаж, халдлага үйлдэхийг уриалжээ.

Лондонгийн халдлагатай холбогдуулан 12 этгээдийг саатуулаад байна.

Б.Дэлгэрцэцэг