Мэргэжлийн сүмо бөхийн 70 дахь их аварга Харүмафүжи Д.Бямбадорж эх спортоосоо зодог тайлах шийдвэр гаргасан талаар түүний дэвжээний багш өнөөдөр мэдэгдлээ. Өнөөдөр түүний хүсэлтийг Сүмо Бөхийн Холбоонд гардуулан өгөх бөгөөд энэ талаараа өнөөдөр  Японы цагаар 14:00 цагаас буюу манай цагаар 13:00 цагт хэвлэлийн бага хурлаар өөрөө зарлах гэнэ.

Исегахама дэвжээний багш Асахифүжи “Харүмафүжи нь холбоонд болон олон нийтэд маш ноцтой асуудал үүсгэсэн учраас хариуцлагаа ухамсарлаж ийм шийдвэр гаргаж байна” гэж сэтгүүлчдэд мэдэгдлээ.

Өдгөө 33 настай Харүмафүжи нь өнгөрөгч 10 сард 27 настай Таканойва А.Баасандоржийг цохиж гэмтээсэн үйл явдал болсон. Уг хэрэг Тоттори хотод үзүүлэх тоглолт барилдаан болж байх үеэр бөгөөд орой Монголын сүмочид нэгэн шөнийн цэнгээний газар бөөндөө сууж байхад болсон билээ. 

Харүмафүжи аварга цагдаад Таканойва А.Баасандоржийг алгадаж, гараараа болон караоке төхөөрөмжийн удирдлагаар цохисон гэж мэдүүлэг өгсөн талаар эх сурвалжууд мэдээлж байна. Уг хэрэг Хакүхо их аваргыг юм ярьж байх үед Таканойва А.Баасандорж утсаа оролдож үл тоомсорлосон гэсэн шалтгаанаар эхэлсэн байна.

Ингээд сүмо бөхийн холбооноос өчигдөр гаргаад байсан зодог тайлуулах, сүмо бөхийн башёд барилдах эрхийг хасах гэсэн шийтгэлийн хэлбэрүүдээс өөрөө зодог тайлахыг Харүмафүжи аварга сонгож байна. Харин цагдаагийн байгууллагад нэгэнт хавтаст хэрэг нээгдсэн тул уг хэрэг прокурорт шилжих аж. Эх сурвалжуудын мэдээлж буйгаар энэ оны төгсгөлд пррокурорын газраас түүнд зохих шийтгэлийг сонсгох бололтой.

Таканойва А.Баасандорж нь 11 сарын башёг толгой болон гавал ясандаа гэмтэл авсан учраас өнжсөн бол Харүмафүжи Д.Бямбадорж аварга уг хэрэгтэй холбоотойгоор тэмцээнийг 3 дахь өдрөөс хойш үргэлжлүүлэх боломжгүй болсон билээ.

Эх сурвалж: japantoday.com

Б.Энх-Амгалан