Шатахууны үнэ нэмэгдээд буй. Үүнтэй холбогдуулан зарим импортлогч компани шатахуун түгээлтэд хязгаарлалт хийж, зохиомлоор хомсдол үүсгээд байна. Үүнд ШӨХТГ-аас хяналт шалгалт хийж байна. Энэ талаар өнөөдөр мэдээлэл хийлээ. Шатахууны үнэ нэмэгдсэн нь хууль бус гэдгийг тус газраас хэлж байна. Мөн шатахууны 41 хоногийн нөөцтэй байгаа учраас хомсдол үүсэх нөхцөл үүсээгүй гэдгийг мэдэгдэв.

ШӨХТГ-ын дарга Б.Лхагва “төр, хувийн хэвшлийн оролцоотой хамтарсан зөвлөл шийдвэр гаргаагүй байхад үнэнд өөрчлөлт оруулж, хомсдол үүсгэхийг бид хүлээн зөвшөөрөхгүй. Тиймээс үнээ нэмж, хомсдол үүсгэсэн Магнай трейд, Сод монгол, Тэс петролиус гэсэн компаниудыг шалгаж байна. Удаа дараа хууль зөрчиж, Засгийн газрын шийдвэрийг үл тоосон Магнай трейд компанийн эрхийг түдгэлзүүлэх саналыг УУХҮЯ-нд өнөөдөр хүргүүлж байна” гэсэн мэдээллийг өгөв. Мөн тус байгууллагуудыг Зөрчлийн хуулийн дагуу шалгаж буй аж.

Энэ талаар зарим зүйлийг тодрууллаа.

-Магнай трейдын эрхийг цуцлах санал гаргажээ. Тэгвэл бусад импортлогчдод ямар хариуцлага хүлээлгэх вэ?

-Удаа дараалан зөрчил гаргаж байгаа Магнай трейдын эрхийг түдгэлзүүлэх асуудлыг тавьж байна. Энэ үйлдлээ таслан зогсоохгүй, иргэдэд чирэгдэл төөрөгдөл үүсгэсэн байдлаа удаа дараа гаргаад байвал бид зохих ёсны арга хэмжээг авна.

-Орон нутагт хомсдол үүссэн үү?

-Аж ахуйн нэгжүүд АИ92 болон дизелийн түлшийг нэмэхгүй зарчим баримтлаад бусдын үнийг нэмсэн. Энэ бол тэдний зальжин арга. Үнийн зөвлөл шийдвэр гаргаагүй байхад ямар ч шатахууны үнийг нэмэх ёсгүй. Бид 21 аймгаас мэдээлэл авсан. Одоогоор 16 аймагт бензин, дизелийн түлшний үнэ нэмэгдэж, хязгаарлалт тогтоосон байна. Харин Завхан, Сүхбаатар, Увс аймагт үнэ нэмэгдээгүй байна. 

-“Роснефть” Монголын зах зээлийг сонирхож буй, санал тавьсан гэх мэдээлэл байна. Энэ боломжтой юу?

-Энэ асуудалд хуулийн тайлбар хэлье. Газрын тосны хуулийн 7.2-т Монгол Улсад газрын тосны бүтээгдэхүүний 30-аас дээш хувийг дангаараа нийлүүлж байгаа гадаадын хуулийн этгээд дотоодын зах зээлд өөрийн хөрөнгө оруулалт бүхий хуулийн этгээд болон өөрийн харьяалал, хяналтад байдаг нэгжээрээ дамжуулан бүтээгдэхүүнээ борлуулахыг хориглоно гэж заасан байдаг. Тиймээс хуулийн дагуу Роснефть орж ирэх боломжгүй. Газрын тосны хуулинд нэмэлт өөрчлөлт оруулах, нефть импортлогч аж ахуйн нэгж байгууллагад хүлээлгэх үүрэг, хариуцлагыг өндөр түвшинд тавих, хүлээсэн үүргээ зөрчсөн тохиолдолд авах хэмжээг хуульчилж өгөх шаардлагатай байна.

Б.Энэрэл