"Дүнжингарав-2018” хаврын бүсийн хурдан морины уралдаан Говьсүмбэр аймгийн Баянтал сумын Баянтал гэх газарт /2018.03.18/ болсон. Соёолон насны морьдын уралдаан харанхуй шөнө болсноос улбаалан унаач хүүхдүүд унаж, бэртсэн тухай мэдээлэл цацагдаад байна. Энэ талаар ММСУХ-ноос албан ёсны тайлбар хийлээ.

П.Сэргэлэн: Соёолон 17.30 цагт гарааны зурхай руу мордсон

/ММСУХ-ны ерөнхий нарийн бичгийн дарга/

ММСУХ-ны ерөнхий нарийн бичгийн дарга П.Сэргэлэн “Засгийн газрын шийдвэрийн хүрээнд бид 12-оос дээш насны 307 хүүхдийг бүртгэж уралдаанд оролцуулсан. Соёолон насны морьдын уралдаан хамгийн сүүлд болдог. Энэ уралдааны өмнө их насны морьдын уралдааны үеэр маш их тоос боссон. Шалтгаан нь энэ жилийн уралдаан болсон өдөр их дулаан, Баянтал сумын нутагт цасгүй байлаа. Мөн уралдааны үеэр зөвшөөрөлгүй маш олон машин уралдааны талбай руу дайрч орж ирсэн. Энэ бүгдээс шалтгаалан уралдаан сунжирсан. Иймд комиссын дарга, Гэр бүл, хүүхэд залуучуудын газраас уяач, үзэгч, хүүхдүүдээ цуглуулаад соёолон насны морьдын уралдаанаа хойшлуулах саналыг удаа дараа тавьсан. Гэтэл уяачид маань ундуйцаж, унаач хүүхдүүд маань мордчихсон байсан. Хоноглох газар, морьдын хоол тэжээл зэрэг асуудлыг уяачид хэлж санал тавьсан.

Уралдаан эхлэхэд 17.30 цагт гарааны зурхай руу морьд хөдөлсөн. Соёолон насны морьдын үүлдэр тогтоох байсан ч цаг давчуу байсан тул зөвхөн шүдлээд мордуулсан. Мөн хүүхдийн насанд хяналт тавьсан. Морьд эргэхэд гэгээтэй байсан ч уралдааны зам талдаа орж байхад бүрэнхий болсон. Ийм л нөхцөл байдалтай уралдаан болсон. Хамгийн том хүндрэл бэрхшээл нь зөвшөөрөлгүй олон машин уралдааны зам руу дайрч орж ирсэн явдал байлаа. Бид хүүхдийн эрүүл мэндэд санаа зовж байна. Бид хариуцлага хүлээхэд бэлэн” гэв.

Ш.Лхамсүрэн: Соёолонг уралдуулахгүй бол уяачид комисс руу дайрахаар байсан

/"Дүнжингарав" наадмын зохион байгуулах комиссын дарга/ 

“Дүнжингарав” наадмын зохион байгуулах комиссын дарга Ш.Лхамсүрэн “Их насны морины уралдааны дараа маш их тоос боссон тул комисс дахин хуралдаж, уяачид, наадамчдыг дуудан санал авахад олон уяач соёолонг уралдуулахгүй бол бидэн рүү дайрах хүртэл нөхцөл байдал үүсэх байсан. Иймд соёолонг уралдуулсан. Соёолонгийн түрүүч орж ирэхэд гэгээтэй байсан. Морьд цуварч ирсээр байтал харанхуй бүрэнхий болсон. Бид 12-оос дээш насны хүүхэд морь унаж уралдуулна гэдэг тогтоолын дагуу олон хүүхдийг наадамд оролцуулалгүй буцаасан.  Бид айрагдсан морьдын бай шагналыг энэ сарын 19-нд буюу маргааш нь өгсөн. Тэнд байсан бүх уяачийг байлцуулж эхний таван морийг байлсан учраас гомдол гарахгүй болов уу гэж найдаж байна. Соёолонг гарахад нь үүлдрийг нь шалгаагүй тул соёолонгийн бай шагналыг өгч чадаагүй” гэв.

Уралдаанд 307 хүүхэд морь унаж уралдсан бөгөөд эрлийз дээд насны уралдаанаар хоёр хүүхэд, азарганы уралдаанд 3, их насны морины уралдаанаар 9, соёолонгийн уралдаанаар 3 хүүхэд морьноос унасан байна. Азарганы уралдааны үеэр унасан хүүхэд ГССҮТ-д хэвтэн эмчлүүлсэн харин соёолонгийн уралдаанаар унасан хүүхдүүд бэртэж, гэмтээгүй аж.  Уралдааны үеэр 16 хүүхэд мориноос унасан гэх мэдээллийг Гэр бүл, хүүхэд залуучуудын газраас өгсөн. Тэгвэл ММСУХ-ноос унасан 16 хүүхдийн 15 нь бэртэл гэмтэл аваагүй. Нэг хүүхэд тархиндаа доргилттой гэсэн оноштойгоор эмнэлэгт хэвтэн эмчлүүлж байгаад өнөөдөр гарсан гэдэг мэдээллийг өгч байна.

Мориноос унасан хүүхдүүдийн эрүүл мэндэд онцгой анхаарч байгаагаа ММСУХ-ны удирдлагууд хэллээ. Хүүхдүүдийн эмчилгээнд шаардлагатай зардал мөнгийг 100 хувь хариуцан ажиллаж байгаа ажээ. 

Г.Тэгшсүрэн