Холбоотнууд Сирид агаараас цохилт өгч эхэллээ. Энэ талаар “www.dailymail.co.uk” сайт мэдээллээ.

АНУ-ын Ерөнхийлөгч Дональд Трамп саяхан Сирийн Ерөнхийлөгч Башар аль Ассадыг ард түмнийхээ эсрэг химийн зэвсэг ашигласныхаа хариуг нь заавал барихаа мэдэгдсэн билээ.

Цагаан ордны тэргүүн ийнхүү мэдэгдснийхээ дараахан Сирийн Засгийн газрын байгууламжуудад агаараас цохилт өгчээ. АНУ ганцаараа бус Их Британи болон Франц улстай хамтран Сирид агаараас цохилт өгөв.

Эртнээс Ассадын дэглэмийг түлхэн унагаахаар тэмцэж байсан дээрх гурван улс Сирид 118 удаа агаараас цохилт өгсөн байна.  “Цэргийн ажиллагааны үеэр 70 орчим энгийн иргэн амиа алдсан” талаар Хүний эрхийн байгууллагууд уламжлав.  Тэгвэл өчигдөр АНУ-ын зэвсэгт хүчний штабын дарга, генерал Жозеф Данфорд “Сирийн Засгийн газрын харъяат химийн зэвсэг хадгалдаг гурван томоохон объектийг амжилттай устгасан” хэмээн хэвлэлийнхэнд мэдэгджээ.

Гэхдээ уг мэдэгдлийг ОХУ-ыг эрс үгүйсгэсэн байна. “Америкчуудын химийн зэвсэг хадгалсан гэгдээд буй гурван байгууламж бол ашиглалтаас гарсан үйлдвэрүүд. Олон жилийн өмнө эдгээр үйлдвэрүүдийг ашиглахаа больсон. Ямар эх сурвалжаас эдгээр үйлдвэрүүдэд химийн зэвсэг хадгалдаг гэх мэдээллийг авсан нь тодорхойгүй байна” хэмээн ОХУ-ын зэвсэгт хүчний хурандаа Сергей Рудской мэдэгджээ.

Тэрбээр мөн АНУ болон холбоотнуудын харвасан 103 пуужингийн 71-ийг нь бид амдаж устгасан. Тиймээс холбоотнууд Сирид тийм ч их хэмжээний хохирол учруулаагүй” гэв.

Энэхүү мэдээллийг Пентагоны хэвлэлийн төлөөлөгч Дана Уайт эрс үгүйсгэж “Холбоотнудын харвасан бүх пуужин байгаа амжилттай харвасан. ОХУ  худал мэдээллийг нийгэмд хүргэж байна” хэмээн хатуухан мэдэгджээ.

Саяхан Сирийн Дума хотноо иргэдийн эсрэг химийн зэвсэг ашигласан ноцтой хэрэг гарсан билээ. Уг химийн халдлагаар 48 хүн амиа алдсан бөгөөд АНУ болон Европын орнууд энэхүү аймшигт хэргийн ард Сирийн Ерөнхийлөгч, армийнхан бий. Мөн ОХУ, Ираны эрх баригчид Ассадад дэмжлэг үзүүлсэн” хэмээн  мэдэгдэж, Ассадад хариуг нь заавал барихаа олон нийтэд амласан юм.

Иргэдийнхээ эсрэг химийн зэвсэг ашигласан гэдгийг Ассад эрс үгүйсгэсэн бол ОХУ-ын Ерөнхийлөгч В.Путин “Барууны орнууд өөрсдийн зохиосон үлгэртээ итгээд хэцүүдэж байна” гэж хэлжээ.

АНУ өнгөрсөн онд Сири улс руу нийт 59 ширхэг “Томахавк” пуужин харваж байжээ. Холбоотнууд амралтын өдөр Сирид явуулсан цэргийн ажиллагааны үеэр харвасан гэгдэж буй пуужингууд “Томахавк” бол нийт зардал нь 165 сая ам. доллартой тэнцэх гэнэ.

Сирийн асуудлаар ОХУ-ын Ерөнхийлөгч В.Путин энэ амралтын өдөр Туркийн Ерөнхийлөгч Режеп Тайип Эрдогантай утса ар ярилцсан талаар Кремлийн хэвлэлийн албанаас уламжлав.

Удирдагч нар Сирийн хямралыг шийдвэрлэхэд хамтран ажиллахаар тохиролцжээ.

“АНУ болон барууны орнууд зөвшөөрөлгүйгээр Сирид цохилт өгсөн нь олон улсын хууль дүрмийг зөрчсөн явдал. Бид энэхүү асуудалд хамтран ажиллах хэрэгтэй” хэмээн Путин мэдэгдэв.

Химийн зэвсэг ашигласан гэх Сирийн Дума хотноо Олон Улсын Химийн зэвсгийг хориглох байгууллагынхан ажилласан бөгөөд тэд албан ёсны дүгнэлтээ танилцаагүй байхад Трамп дур мэдэж, Сирид цэргийн ажиллагаа явуулсныг Путин эрс буруутгажээ. “Тэд хүчтэй байж болно.  Гэхдээ тэдэнд хууль үйлчилдэг байх ёстой” гэж Путин хэлэв.

Британийн Ерөнхий сайд Терезай Мэй “ОХУ, Ассадын дэглэмийг дэмжиж, цэргийн ажиллагаанд саад учруулж байгаа нь олон улсаас урвасантай ижил” гэв. Тэрбээр мөн АНУ, Их Британи болон Францаас гадна Аюулгүйн зөвлөлийн бүх орныг нэгдэж, Сирид цохилт өгөх хэрэгтэй гэжээ.

Б.Дэлгэрцэцэг