Малайз улсад зохион байгуулагдсан парламентын сонгуулийн дүн гэнэтийн байлаа.

Учир нь Ерөнхий сайд Нажиб Разакын тэргүүлсэн эрх баригч “Барисан Насионал” ялагдал хүлээснээр эрх баригчдын 61 жилийн ноёрхол төгсгөл болсон юм.

Энэхүү түүхэн сонгуульд 1981-2003 оны хооронд Ерөнхий сайдаар ажилласан Махатхир Мохамадын тэргүүлсэн сөрөг хүчин Пакатан Харапан ялалт байгуулжээ. Тус нам парламентын нийт 222 суудлын 122-д ялалт байгуулж, олонх болов.

Махатхир Мохамад 23 жил Ерөнхий сайдаар ажилласан туршлагатай нэгэн бөгөөд өдгөө 92 насыг зооглож буй юм. Тэрбээр манай гаригийн хамгийн хөгшин Ерөнхий сайдаар нэрлэгдэж байна.

Махатхир Мохамад ялалт байгуулсаныхаа дараа ард түмэндээ хандан “Эх орныхоо эд баялгыг хувьдаа завшиж, цөлмөсөн хэмээн дэлхий нийтээр буруутгаж буй Ерөнхий сайд Нажиб Разакт хариуцлага тооцож, улмаар түүнд тусалсан зарим хүмүүсийг шударга шүүхийн өмнө зогсоох болно. Энэхүү авлигын дуулианы улмаас хөрөнгө оруулагчид манай улсад итгэл алдарсан. Тиймээс хөрөнгө оруулагчдын төрд итгэх итгэлийг сайжруулах шаардлагатай. Мөн саяхан баталсан хуурамч мэдээллийн хуулийг дахин шалгах, нягтлах хэрэгтэй. Үндэсний Аюулгүй байдлын зөвлөл хүмүүсийг айлгаж сандаргадаг байдал тогтсон байна” гэж мэдэгджээ.

Б.Дэлгэрцэцэг