Улсын нэгдсэн төв эмнэлэг Монголд анх удаа зүрх шилжүүлэн суулгах мэс ажилбарыг /2018.05.23/ хийсэн тухай өмнө нь мэдээлсэн. Гэвч гавьяат эмч, анагаах ухааны доктор, мэс заслын мэргэжлийн эмч Л.Жамбалжав өнөөдөр /2018.05.29/ сэтгүүлчдэд мэдээлэл хийж, уг мэс заслын үеэр  болон дараа нь хоёр өвчтөн нас барсан гэж мэдэгдэв.

Тэрбээр “Би Монгол Улсын Эрүүл мэндийн салбарт 46 жил зүтгэж байна. Одоогоор мэс заслын чиглэлээр зөвлөх эмч, УКТЭ-ийн бөөр шилжүүлэн суулгах үндэсний багийн зөвлөх эмчээр ажиллаж байгаа. Монгол Улсын түүхэнд анагаах ухааны шинэ ололтууд ахмад эмч нарын зүтгэл, олон жилийн нөр их хөдөлмөрөөр нэвтэрснийг та бүхэн мэднэ. Тухайлбал зүрхний мэс заслыг 1960-аад онд академич Шагдарсүрэн болон түүний шавь нар, хамтран зүтгэгчид Монгол Улсад нэвтрүүлж 50 гаруй жилийн турш зүрхний мэс хийж ирсэн. Улсын килиникийн төв эмнэлэгт өнгөрсөн долоо хоногт зүрх шилжүүлэн суулгах хагалгаа хийжээ. Энэ хагалгаа амжилтгүй боллоо зэрэг мэдээлэл гарч байна. Монголын Эрүүл мэндийн салбарын үйл ажиллагаа ард түмний өмнө нээлттэй байх ёстой. Мэргэжлийн мэс заслын эмчийн хувьд би үнэн зөвийг олон нийтэд танилцуулах гэсэн юм.

Өнгөрсөн долоо хоногт буюу тавдугаар сарын 21-23-ны өдрүүдэд Улсын нэгдүгээр төв эмнэлэгт  64 настай өвчтөн Д гэгч эмэгтэйд гол судасны ховлог суулгах мэс засал, 30 настай өвчтөн З гэгч эмэгтэйд зүрхний тосгуур хоорондын таславчын цоорхой нөхөх мэс заслыг хиймэл цусны эргэлтийн аппарат ашиглан хуурай зүрхэн дээр хийлээ. 64 настай Д нь хагалгааны явцад зүрхний тэжээгч, титэм судасны гэмтлийн улмаас венийн судсаар зүрхэнд нэмэлт судас залгах мэс заслыг хийсэн бололтой. Өвчтөний зүрхийг зогсоосны дараа сэргээгүй өвчтөн ширээн дээрээ нас баржээ. Хоёр дахь хагалгаа өвчтөн З-ийн тосгуурын таславчын цоорхойд нөхөөс хийх хагалгааны дараа өвчтөн хүндэрч, зүрх зогссон байна. Маш харамсалтай. Энэ мэс заслууд нь гуравдугаар эмнэлгийн зүрхний мэс засалчид, миний шавь нарын өдөр тутамд хийдэг ердийн л хагалгаа юм. Хүнд өвчтэй хүн хагалгааны үед болон дараа нь нас барах тохиолдол  байдаг. Гэхдээ дээрх хоёр тохиолдол эмч, эмнэлгийн үйл ажиллагаатай холбоотой гэж үзэж болохоор байна. Мэс заслын дараа нас барсан тохиолдол үхлийн шалтгааныг задлан шинжилгээгээр нотлодог. Харамсалтай нь ямар ч задлан шинжилгээ, дүгнэлт хийлгүй ар гэрийнхэн хүсээгүй гэдэг шалтгаанаар, хууль зөрчсөн алдаа дутагдлаа, гэмт хэргийн нотлох баримтыг санаатай нуун дарагдуулсан гэж үзэж болохоор байна.

Монгол Улс зүрхний мэс заслыг нэвтрүүлж болно, нэвтрүүлэх ч болно. Харамсалтай нь  ингэж хүний амь хохироож болохгүй юм.

Монгол Улс зүрхний мэс засал хийдэг болоод 50 гаруй жилийн туршлагатай, Төрийн шагнал авсан мэргэжлийн хамт олон байсаар байхад унтуулгын эмчээр ахлуулсан зүрх шилжүүлэн суулгах баг, гэдэс дотрын хагалгаа хийдэг газар зүрхний мэргэшсэн эмчгүй хагалгаа хийх болсон шалтгаан юу байв?

Зүрхний мэс заслын тасгуудад хэдхэн сар дагалдсан ямар ч туршлагагүй, бие дааж зүрхний хагалгаа хийгээгүй залуу эмчээр зүрхний хүнд хагалгааг гардуулж байгаа нь ямар учиртай вэ. Хэний зөвшөөрлөөр хэний томилгоогоор залуу эмч мэс заслын багийг удирдах болов?

Зүрхний мэс засал хийх орчин нөхцөл бүрдсэн үү, дутуу багажтай өөр эмнэлгээс багаж хэрэгсэл зөөж орчин бүрдүүлэх шаардлагатай байв уу. Орчин нөхцлөө бүрдүүлээгүй байж, тусгай нарийн мэргэжлийн мэс засал хийх шаардлага юу байв” гэдэг мэдээллийг хийлээ.

Г.Тэгшсүрэн