АНУ-ын Юта мужийн Солт Лэйк Сити хотын оршин суугч Дуэйн Юд гэх 46 настай эр уурандаа “Cessna 535” онгоцоороо өөрийн байшингаа мөргөсөн талаар “CNN” агентлаг мэдээллээ.

Уг хэрэг өчигдөр 12.30 цагийн орчимд гарчээ. Осол гаргасан “Cessna 535” онгоц Юдагийнх биш бөгөөд түүний ажилладаг байгууллагынх гэнэ.

Дуэйн Юд хэрэг гарахын өмнө гэр бүлийн хүчирхийллийн хэргээр цагдаагийнханд баригдсан аж. Юд архи хэтрүүлэн хэрэглэсэн үедээ эхнэрээ зодож, хүнд гэмтээсэн учир хөршүүд нь цагдаагийнханд дуудлага өгчээ.

Тэрээр өнгөрсөн ням гаригт батлан даалтаар суллагдсан даруйдаа дээрх хэргийг үйлджээ.

Онгоцоор байшинг мөргөх үед гэрт хэн ч байгаагүй гэнэ. Хэрэг гарахаас хэдхэн минутын өмнө Юдын эхнэр хүүгийнхээ хамтаар байшингаас гарч амжсан байжээ.  Тэд энэхүү байшинг өнгөрсөн онд худалдан авчээ. 

Б.Дэлгэрцэцэг