АНУ-ын эрх баригчид Тайваньд 330 сая ам.долларын зэвсэг, эд анги нийлүүлэх санал гаргасан талаар “Ройтерс” агентлаг мэдээллээ. Уг саналыг Тайванийн эрх баригчид хүлээн авчээ.

Пентагон “F-16”, “C-130”, “F-5” байлдааны онгоцууд болон эд ангиудыг Тайваньд нийлүүлэхээр төлөвлөж буйгаа илэрхийлээ. Худалдааны асуудлаас болж таарамжгүй харилцаатай байгаа БНХАУ, Тайваньд зэвсэг нийлүүлэх АНУ-ын саналыг эрс буруутгажээ.

Тайванийн тал “АНУ-ын дэмжлэгтэйгээр Батлан хамгаалах салбарын шинэчлэл, хүчин чадлыг нэмэгдүүлэх таатай нөхцөл бүрдлээ” гэж мэдэгдэв.  Гэхдээ хэзээ америк зэвсгээр Тайванийг зэвсэглэх өдрийг Пентагон зарлаагүй байна. 

БНХАУ-ын эрх баригчид Тайванийг газар нутгийнхаа нэгээхэн хэсэг хэмээж, “Нэг Хятад” бодлогыг нь дэмжин ажиллахыг олон улсаас шаарддаг.

Бээжин, Тайванийг ганцаардуулахын тулд дипломат харилцаа тогтоосон улс орнуудад хөрөнгө оруулалт хийж, Тайванийг шахан гадуурхдаг билээ.

АНУ-ын эрх баригчид Тайванийг тусгаар улс гэдгийг хүлээн зөвшөөрдөггүй. АНУ-ын Ерөнхийлөгчөөр Дональд Трамп сонгогдсоны дараахан АНУ, Тайванийн харилцаа сайжирсан билээ. Трамп нэг бус удаа Тайванийг УЛС хэмээн нэрийдсэн удаатай.

Пентагоны тэргүүн Жеймс Маттис өнгөрсөн долоодугаар сард Бээжин хотноо айлчлах үеэрээ тус улсын тэргүүн Си Зиньпинтэй уулзсан билээ.

Энэ үеэр Маттис “Бээжин Өмнөд Хятадын тэнгист эзлэн түрэмгийлэх бодлого явуулж , хөрш зэргэлдээ орнуудаа заналхийлж байгааг АНУ тэвчихгүй” гэж мэдэгдлээ. Уг мэдэгдлийг хариуд Си дарга “Өвгө дээдсийнхээ үлдээсэн газар нутгаас нэг ямхыг ч бусдад алдаж чадахгүй. Дахин газар нутгийн бүс нутгуудын асуудлаар АНУ-тай яриа өрнүүлэхгүй” гэв.

Б.Дэлгэрцэцэг