УИХ-ын чуулганы үдээс хойшхи нэгдсэн хуралдаан эхэлсэн хэдий ч хэлэлцэх асуудалдаа байлцах Засгийн газрын гишүүд, ирц  ч хангалтгүй байлаа. Тиймээс гишүүд горимын санал хэлж байгаа юм.

ХЗДХ-ийн сайд Ц.Нямдорж:

УИХ-ын дарга та асуудлаа бод. Хэд дахин хэлүүлэх гэсэн юм. УИХ өөрөө ямар байдалд орчихсон байгаагаа харахгүй байна уу. Олон юм яриад байх юм. Нэг хүний албан тушаалтай тэнцэх УИХ гэж байхгүй шүү. Үүнийгээ өөрсдөө бодоцгоо. Энд 20 хүрэхгүй хүн сууж байна. УИХ чинь цаашдаа яах гэж байна. Нөхрийн ёсоор зөндөө хэллээ. Ж.Мөнхбат аа, чи дуугүй бай, олон хоног шалчигнахыг чинь харлаа. Тавин хувь нь эсэргүүцээд танхимаас гараад явчихсан байхад цаашдаа яаж авч явах гэж байгаа юм. Би УИХ-ын дарга гэдэг албан тушаалыг чинь өгч үзсэн.

Манай намынхан зохион байгуулалттай ҮХЦ-д намайг өгөөд “Би УИХ-ын үйл ажиллагаа сэвтэх ёсгүй” гэж үзээд өгч байлаа. Би ийм нөхцөл байдал үүссэн байна гэж М.Энхболд даргад хэлсэн,_ нөхрийн ёсоор. Албан тушаалаа өгөөд юм алдаагүй, би. Сонгууль болоход зардал гардаг. Та бүхний тал талаасаа хийгээд байгаа зүйл чинь энэ улсыг Украйн болгох тал руу явж байна шүү. Тийм учраас М.Энхболд дарга та энэ УИХ-аа яаж явуулах вэ гэдгээ бод. Ингээд больё хэмээн картаа сугалан гарлаа. Дараагаар нь гишүүн Ж.Мөнхбат:

-Монголын төр ажлаа хийх ёстой гэж би бодож байна. Ажлын цагтаа ажилдаа ирээд сууж байгаа бидний буруу юу. Засгийн газрын нэг гишүүн нь байхгүй. Хамгийн том салбарын сайдыг томилоод өгье гэж байгаа УИХ-ын гишүүдийн буруу юу. Эсвэл Засгийн газрын оруулж ирж байгаа асуудлаа хэлэлцүүлэхгүй, сайд нар нь картаа сугалаад явж байгаа сайд нарын буруу юу. Эрх барьж байгаа МАН төр удирдаж чадахгүй байна гэж ард түмэн харж байна. Бүгдээрээ тарцгаая. Хуулийг сахин биелүүлэх үүрэгтэй Хуулзүйн сайд нь хүртэл картаа сугалаад гарч байна. УИХ-ын даргыг огцруулах шаардлага тавиад байгаа дөрөв УИХ-ыг тараах миний бланк дээр гарын үсэг зурна байх. Хэрвээ зурахгүй бол шоу хийж байна гэж харна шүү хэмээлээ. 

УИХ-ын дарга М.Энхболд "Үдээс өмнөх хуралдаан дээр УИХ-ын даргыг огцрох шаардлагыг тавьсан. Ц.Нямдорж гишүүн энэ гишүүдтэй уулз гэсэн. Би уулзсан. Уулзалтын үеэр зарим нь орхиод гарсан. Хууль тогтоох дээд байгууллагын үйл ажиллагааг тараана гэдэг асуудал гарч байгаа ийм үед би өргөдлөө өгөөд явна гэж байхгүй. Хуулийн үндэслэл байвал асуудлаа тавьж болно. Төрийн үйл ажиллагаа тасралтгүй явж байх ёстой. Тийм учраас би УИХ-ын Тамгын газраас тайлбар хүсч байна. Өглөө ирцэнд орсон гишүүд картаа сугалан авч гарсан бол ямар нөхцөлтэй байх вэ" гэлээ. 

УИХ-ын Тамгын газраас Дэгийн хуульд заасны дагуу "УИХ-ын гишүүн өглөө ирцэд бүртгүүлээд дараагийн хэлэлцэх асуудалд эсэргүүцэх шалтгаантай картаа сугалан авсан бол санал хураалтад эсрэг санал өгсөн тооцож, санал өгөх ёстой" гэсэн тайлбарыг хийв. 

Ингээд УИХ-ын гишүүн Л.Энх-Амгалангийн гаргасан "УИХ-аас Засгийн газарт шаардлага хүргүүлэх тухай горимын саналаар санал хураалт явуулахад дэмжлээ. Мөн өнөөдрийн хэлэлцэж байгаа асуудлыг хойшлуулж, дотоод асуудлаа хэлэлцэх Д.Оюунхорол гишүүний санал дэмжигдив. Ийнхүү өнөөдрийн чуулганы хуралдаан өндөрлөлөө. 

Н.Энх