Дубайн хөрөнгө оруулалтын төлөвлөгөөг цуцлах талаар ДМ ногоон нэгдлээс өнөөдөр (04.09) мэдээлэл хийлээ.
2009 онд хийгдсэн Оюутолгойн гэрээ маш их алдаатай, Монгол Улсад хохиролтой болсон. Үүний дараа хийгдсэн Дубайн гэрээ өмнөх гэрээний алдааг баталгаажуулсан. Тиймээс Ч.Сайханбилэгийн Засгийн газрын үед хийгдэн Дубайн гэрээг хүчингүй болгох ёстой. Учир нь Монгол Улсын хууль тогтоомжийг зөрчсөн энэ гэрээ ганцхан Ерөнхий сайд Ч.Сайханбилэгийн гарын үсгээр хийгдсэн гэдгийг тус нэгдлийн Удирдах зөвлөлийн дарга Д.Даш хэллээ.
Дубайн гэрээг байгуулахад бэлтгэх, ажлын хэсгийг томилох зэрэг асуудлаар тухайн үеийн Ерөнхий сайд Ч.Сайханбилэг 2015 оны нэгдүгээр сарын 23-наас эхлээд дөрвөн удаа захирамж гаргасан аж. Энэ дөрвөн захирамждаа үндэслээд 2015 оны тавдугаар сарын 18-нд Дубай хотод гэрээнд гарын үсэг зурсан. Ингэж Дубайн гэрээ байгуулагдсан юм.
Харин ДМ ногоон нэгдлээс энэ асуудлаар Ерөнхий сайдын захирамж бус Засгийн газраар хэлэлцсэн тогтоол гарах ёстой гэж үзэж байна. Тиймээс Дубайн гэрээний үндэс болсон Ч.Сайханбилэгийн гаргасан дөрвөн захирамжийг хүчингүй болгуулахаар Захиргааны хэргийн шүүхэд хандсан байна. Энэ талаар тус нэгдлийн зөвлөх Ч.Бат-Эрдэнэ “Үндэсний аюулгүй байдал, эдийн засагт нөлөөлөх шийдвэрийг ганцхан хүний захирамжаар гаргасан нь хариуцлагагүй үйлдэл. Энэ захирамжууд хүчингүй болвол Дубайн гэрээ цуцлагдаж, Оюутолгойн ашиггүй гэрээ хөндөгдөнө” гэсэн мэдээллийг өглөө.
М.Болд
Уншиж байна |