ОХУ-ын Вологда хотын иргэн Евгений Секретарев тус хотын №40 хүүхдийн цэцэрлэгийг засахад туслахыг хүсэн Монгол улсын Ерөнхийлөгчид захидал илгээсэн талаар https://newsvo.ru мэдээллээ. 

Тэрбээр орон нутгийн захиргааныхан хүсэлтийг нь ойшоогоогүй тул хөрш орны төрийн тэргүүнд захидал бичсэн гэнэ. Түүнчлэн Украины Ерөнхийлөгч Владимир Зеленскийд ч захидал бичихээр төлөвлөж байгаагаа эх сурвалжид ярьжээ. 

Евгений Секретаревын өгүүлснээр цэцэрлэгийг засах санхүүжилт олгохгүй байгаа талаар цэцэрлэгийн  эрхлэгч ярьсны дараа боловсролын газрын даргатай уулзахад энэ жил засвар хийгдэхгүй гэсэн хариу өгчээ. 

Мөн Оросын хэрэглэгчийн хяналтын газар болон мужийн засгийн газраас тодорхой хариу ирээгүй тул Евгений Секретарев Монголын ерөнхийлөгчид захидал бичсний дээр Вологда хот хүүхдийн цэцэрлэгүүдийн асуудлаа шийдэж чадахгүй байгаа тул цааш үргэлжлүүлэн Украины Ерөнхийлөгч Владимир Зеленскийд захидал бичихээр төлөвлөж байгаа гэнэ. 

Г.Бямбасүрэн