Орос улсад үнэт металлтай холбоотой банкны ажиллагаанд ноогдуулах нэмүү өртгийн татварыг цуцласан хууль үйлчилж эхлэснээр алт тушаалт нэмэгдсэн талаар Оросын хэвлэлүүд мэдээлж байна. 

Тодруулбал, зохих хуулийн төсөлд өнгөрсөн сард Оросын Ерөнхийлөгч Владимир Путин гарын үсэг зурсан бөгөөд энэ хуулийн дагуу иргэд болон хуулийн этгээдүүдээс үнэт металл авах, өөрийн нэрийн өмнөөс өөрийн зардлаар хүлээн авсан үнэт металлыг байршуулах, үнэт металлаар данс нээх, хөтлөх, түүнчлэн хувь хүн болон хуулийн этгээдүүдийн даалгавраар гуйвуулга хийх, тэр дундаа үнэт металлаар нээсэн банкны данс хөтлөх гэсэн ажиллагаанууд НӨТ-аас чөлөөлөгдсөн юм. 

Түүнчлэн зээлийн байгууллагуудын гүйцэтгэдэг хэлэлцээрүүдийн жагсаалтад үнэт металл болон үнэт металлаар хийсэн зоостой гүйлгээг мөн багтаажээ. 

Ийнхүү татварыг цуцласнаар хуулийн этгээдүүдийн зүгээс алтны эрэлт нэмэгдэхийн дээр Орост ам.долларын хадгаламжийг орлуулах хувилбар үүсгэх шаардлагатай болсон тул үүнд алт хамгийн тохиромжтой хувилбар гэж хууль санаачилагчид үзсэн байна. 

Дээр дурьдсан хуулиудыг хэрэгжүүлснээр алтны эрэлт 14 дахин нэмэгдэнэ гэж тооцоолжээ. 

Г.Бямбасүрэн