Гоо сайхны мэс ажилбар хийлгэх явцад эмнэлгийн буруутай үйл ажиллааны улмаас 2019 оны дөрөвдүгээр сард 29 настай О  амиа алдсан харамсалтай хэрэг өнгөрсөн онд гарсан билээ.

Иргэн О нь жингийн илүүдэлгүй байсан ба 60 кг жинтэй, ямар нэгэн суурь өвчингүй, ид хийж бүтээх насан дээр байсан талаар талийгаачийн аав Г.Мэндсамбуу, ээж Г.Аюуш, өмгөөлөгч Л.Баасанжав нар мэдээлэл хийлээ.

Үйлчилгээ үзүүлэгч байгууллага хагалгааны өмнөх бэлтгэл ажлын зөвлөгөө өгөөгүй, талийгаач мэс засалд орох талаар ар гэрийнхэндээ мэдэгдэж зөвлөлдөж амжаагүй байжээ.

Талийгаачийн ар гэрийнхэн  “Тод каннам” эмнэлгээс талийгаачийн охины ирээдүйн батлан даалт, оршуулгын зардлыг нэхэмжилжээ. Гэвч тус компанийн зүгээс өнөөдрийг хүртэл хохирогчийн ар гэртэй уулзаж, холбоо бариагүй нь зэрэгцээ уучлалт гуйгаагүй талаар тэд мэдээлэв.

“Шүүх хурлын үеэр эмнэлгийн төлөөлөл гэмшсэн байдал огт илэрхийлээгүй бүр ар гэр лүү нь хараад инээсэн үйлдэл үзүүлсэнд хохирогчийн тал тун их эмзэглэж байгаа. Цаашдаа Монголын үр сад дахин бүү алдаа гаргаасай, ахин нэг ч эмэгтэй тусгай зөвшөөрөлгүй чанарын шаардлага хангаагүй хууль дүрмийн дагуу үйл ажиллагаа эрхэлдэггүй хууль бус газруудаар үйлчлүүлж битгий хохироосой гэсэн үндсэн дээр энэ хэргийн үнэн зөвийг олохийн төлөө эцсээ  хүртэл явахаа ар гэрийнхэн нь мэдэгдэв.

Уг эрүүгийн хэргийг Хан-Уул дүүргийн эрүүгийн хэргийн анхан шатны шүүх 2020 оны 1 дүгээр сарын 13-ны өдрийн урьдчилсан хэлэлцүүлгийн шүүх хуралдаанаар хянан хэлэлцээд яллагдагч нарыг шүүхэд шилжүүлж шүүх хуралдааныг 2020 оны 01 дүгээр сарын 27-ны өдрийн 12 цагт товлоод байна.

Л.Бүжин