Хуульч мэргэжлээ орхиод дуучин болохоор зүтгэсэн Г.Эрдэнэтунгалаг хэмээх шавилхан бүсгүй чадалтай хоолой, хөгжмийн зохиолч ээжийнхээ ачаар нийтийн дууны ертөнцөд асар хурдан нэрд гарч байсан цаг саяхан. Гэвч хамтран дуулж байсан Б.Батсайхан нь мөнгө төгрөгийн асуудлаас болоод холбоогоо тасалж, төд удалгүй дуучин бүсгүй бөх залуугийнд амьдарч эхэлсэн. Харамсалтай нь, тэдний харилцаа удаан үргэлжлээгүй. Хөл хүндтэй болсон түүнийг бөх залуу хаяж орхиод өөр бүсгүйтэй хуримласан нь тухайн үедээ л сенсаци дэгдээж байсан билээ.  Балчир охиноо төрүүлээд усанд хаясан чулуу шиг алга болсон дуучин бүсгүй гэнэтхэн теле зохиомж хийлгэн, бүтэлгүй дурлалаа дуугаараа илэрхийлж гарч ирэхдээ бүх л зүйлээ дэлгэсэн юм. Уран бүтээл нь зогсонги байдалд орж, хөл хүндтэй байхдаа хаягдаж хоцорсон түүний хүнд хэцүү үед ээж нь огт туслаагүй гэдгийг ч нуугаагүй. “Сүү, живхний мөнгөөр дутагдаж өнчин нулимстай өнгөрүүлсэн хоног өдрүүдээ бодохоор ээждээ нэлээд гомддог” гэх дуучин бүсгүй өдгөө таагүй дурсамжаа мартахыг хичээж буй гэнэ. Тиймээс ээжийнхээ гэрт очиж, энэ бүхнээ ярилцдаг болж. “Өнгөрсөн бүхнийг мартах хэрэгтэй. Ээж минь надад ухаарал өгөх гэж хатуу загнасан байж болох. Тэр бүхэнд нь гомдлоо гээд яах билээ дээ” хэмээн өгүүлсэн Г.Эрдэнэтунгалаг ойрын хугацаанд гэрлэх бодолгүй байгаа гэв. Р.ЕСҮЙ