Улс орон, иргэд олон нийт эрвийх дэрвийхээрээ тив дэлхийг хамран тархаад буй COVID-19 вирусээр өвчилж орчлонгоос буцахгүй байхсан гэхээс чармайж байна. Тэр дундаа хүн ам цөөн манай улсын хувьд вирусийн тархалт нэгэнт газар авч дэгдвэл хүчин мөхөсдөнө гэдгийг дээр, дооргүй ухаарч буй тул амьд үлдэх, амьдрал хэвийн үргэлжлэх хүртэл хугацааг хэзээ гэдгийг нь мэдэхгүй ч чадлаарай хичээж байгаа.

Бизнес орлогогүйдэж, өрхийн төсөв нимгэрч, ажиллах нь ажиллаж амрах нь амарч арайхан л өдөр хоногийг залгуулж буй ч бүгд л амьд үлдэх хүсэлтэй. Гэтэл өндөр байшингийн ирмэг дээрээс үсрээд амиа хорлохыг хүссэн өөр нэгэн ч байна.

Дорноговь аймгийн Сайншанд сумын 2 дугаар багт байрлах 45 дугаар байрны дээвэр дээрээс хүн унах гэж байна гэсэн дуудлагыг энэ сарын 11-ний өдрийн 13:55 цагт Онцгой байдлын албанд иржээ. Дуудлага мэдээллийн дагуу тус аймгийн Онцгой байдлын газрын Эрэн хайх, аврах бүлгийн 5 алба хаагч, 1 автомашинтай 1.5 км замыг туулан 13:57 цагт очиж 10 минут ажиллан 21 настай, эмэгтэй  Н-ийг амиа хорлох гэж байсныг аварч аюулгүй буулгажээ.

Амьдралын ямар ч шалтгаан байж болох ч дээвэр дээр гүйж гарна гэдэг буруу л сонголт. Хожим өөрийгөө шоолж инээх өдөр ирэх вий. Амьдрал, үхэл хоёр алга дарамхан зайтай.

Хүн зүүний үзүүр дээр ширхэг будаа тогтоох адил тийм их хувь тохиолоор хүний хувь заяаг олж төрдөг гэдэг. Хүнд хэцүү бүрийд орчлонгоос буцах тухай бодож, тэнэмэл цоохор бэрхшээлийн өмнө тэнцвэр алдаж сөгдөхийн оронд хамгийн нандин хүслээсээ зуурч босоод харанхуй бүрэнхий болгоныг гэгээгүүлж мөрөөдөх хэрэгтэй.

Б.Итгэл