Дэлхий даяар цар тахал тархаж, улс орон, хүн бүр эрүүл мэнддээ онцгойлон анхаарч байгаа энэ үед COVID-19 вирусийн халдвар авсан ч эмнэлэгт хэвтэхгүй, эмч нарын шаардлагыг биелүүлэхгүй байх тохиолдол олон оронд гарсаар байна. 

Тухайлбал, ОХУ-ын Буриад улсын нэгэн иргэн халдвар авсан ч эмнэлэгт хэвтэлгүй, эмчилгээнээс татгалзсан тул түүнийг албадан эмнэлэгт хүргэжээ. 

Информполис сайтын мэдээлснээр, эмчилгээнээс татгалзсан 48 настай эрэгтэйн эсрэг Оросын хэрэглэгчийн хяналтын газар шүүхэд нэхэмжлэл гаргасан байна. Улаан-Үд хотын оршин суугч 48 настай эрэгтэй халдвар авсан хүмүүсийн ойрын хавьталд байсан бөгөөд гуравдугаар сарын 29-ний өдөр түүний өгсөн шинжилгээгээр вирусийн халдвар авсан гэдэг нь батлагджээ. Гэвч тэрбээр өвчин нь хөнгөн гэж үзэн эмнэлэгт хэвтэн эмчлүүлэхээс татгалзсан байна. 

"COVID-19 вирусийн халдварын тархалтын нөхцөл байдлыг харгалзан, эмнэлэгт хэвтэн эмчлүүлэхээс татгалзах нь өвчтөний өөрийн болон ойрын хүмүүсийн эрүүл мэндэд аюул заналхийлсэн гэж үзэж байна. Тиймээс Оросын хэрэглэгчдийн хяналтын газар өвчтөнийг албадан эмнэлэгт хэвтүүлэх тухай шүүхэд нэхэмжлэл гаргасан. Улмаар Октябрийн дүүргийн шүүх вирусийн халдвар авсан ч эмнэлэгт хэвтэхээс татгалзсан иргэнийг халдвартын эмнэлэгт албадан хэвтүүлэх шийдвэр гаргасан" хэмээн Буриадын Оросын хэрэглэгчдийн хяналтын газрын хэвлэлийн алба мэдээлжээ.

Энд дуулгахад, дөрөвдүгээр сарын хоёрны өглөөний байдлаар Буриад улсад COVID-19 вирусийн халдварын батлагдсан тохиолдол 30 болсон юм.

Г.Бямбасүрэн