Эрүүл мэндийн яамнаас COVID-19 халдварын цаг үеийн нөхцөл байдлын тухай ээлжит мэдээллийг /2020.04.07/ хийлээ. Хэвлэлийн хуралд ХӨСҮТ-ийн захирал Д.Нямхүү, Эрүүл мэндийн яамны Тандалт, шуурхай удирдлагын хэлтсийн дарга Д.Нарангэрэл, ЭМЯ-ны Гадаад харилцааны хэлтсийн дарга Б.Янжмаа, ДЭМБ-ын мэргэжилтэн О.Ариунтуяа нарын албаны хүмүүс оролцов.

ОХУ-д халдварын тохиолдол хоногт 1000-аар нэмэгдэв. Герман улсад сүүлийн дөрвөн өдөрт халдварын тохиолдол дараалан буурч байна. Өвчилсөн хүмүүсийн дийлэнх хувийг 15-59 насныхан эзэлж байгаа бол эрэгтэй эмэгтэй, хүмүүст өвчлөл 50,50 хувийн харьцаатай байгаа аж. 

ХӨСҮТ-ийн ерөнхий захирал Д.Нямхүү "Өнөөдөр хоёр хүн эдгэрч ХӨСҮТ-өөс гарч байна. Гурван өдөр дараалан таван төрлийн шинжилгээ хийхэд  сөрөг хариу гарсан. Эдгээр иргэн сувиллын газарт хяналтаа үргэлжлүүлнэ. Энэ хугацаанд дахин шинжилгээ авч хянана.

Франц иргэний биеийн байдал сайн байна. Тус өвчтөний "Бадрах Энержи" компани ХӨСҮТ-ийн эмч, ажилчдад зориулан цалин, урамшуулал болгож 100 сая төгрөг хандивлалаа. Энэ хандивыг эмч, ажилчиддаа жигд хуваан урамшуулал болгон тараахаар тохирсон.

Ерөнхий сайд У.Хүрэлсүх хүлээн авч уулзаад надад Лабораторийн хүчин чадлыг нэмэгдүүлэх үүрэг өгсөн. Үүний дагуу нэг лабораторийн шугам ХӨСҮТ-д нээгдлээ. Монгол Улс даяар 2020.04.06-нд сэжигтэй тохиолдолд тусгаарлагдаагүй. Дархан-Уул аймагт тусгаарлагдсан зургаан хүнээс вирус илрээгүй. Мөн ХӨСҮТ 6, Токио -Улаанбаатар чиглэлийн онгоцоор ирсэн 182 хүнээс вирус илрээгүй. Нийт өчигдөр 2222 хүнд шинжилгээ хийхэд вирус илрээгүй сайхан мэдээ байна. Өнөөдөр ХӨСҮТ-д 183 хүн тусгаарлагдан хяналт, тандалт, шинжилгээ хийгдэж байгаа. 

ХӨСҮТ-өөс өчигдөр 65 хүн эмнэлгийн тусгаарлалтаас гарч гэрийн, өрхийн хяналтад шилжсэн. Бид дараагийн онгоцоор хүлээн авах бэлтгэл ажлуудыг ханган ажиллаж байна" гэлээ. 

Манай улсад COVID-19 вирусийн лабораториор батлагдсан 15 тохиолдол бүртгэгдсэн. Ийнхүү дөрвөн иргэн эдгэрэн эмнэлгээс гарч 11 хүн ХӨСҮТ-д хэвтэн эмчлүүлж байна. 

Г.Сүрэн