Оросын агаарын тээврийн "Аэрофлот" компани долоодугаар сарын сүүл хүртэл олон улсын нислэгийн тийз борлуулалтыг зогсоож байгаа талаар тус компанийн хэвлэлийн алба мэдээлжээ.

"Олон улсын агаарын харилцаа сэргэхтэй холбоотой нөхцөл байдал тодорхой болох хзртэл бид тийз борлуулалтаа зогсоохоор шийдлээ. Энэ бол техникийн шийдвэр бөгөөд нислэгүүдийг шууд зогсооно гэсэн үг биш юм. Манай харилцах төв болон борлуулалтын төвүүдээр тийзний захиалгын ачаалал нэмэгдэхээс сэргийлэн ийм шийдвэр гаргаж байна" хэмээн "Аэрофлот"-ын хэвлэлийн төлөөлөгч Юлия Спивакова мэдэгджээ.

Түүний өгүүлснээр, зохих зөвшөөрөл хэзээ авахаас хамааран төлөвлөсөн хугацаанаас ч наана нислэгүүдийг сэргээж магадгүй гэнэ.

Энд дуулгахад, цар тахлын улмаас иргэдийн зорчих хөдөлгөөнд хязгаарлалт тавьсантай холбоотойгоор эрэлт буурсан тул "Аэрофлот" компани дөрөвдүгээр сарын зургааны өдрөөс эхлэн нислэгийн тоогоо цөөлсө юм.

Г.Бямбасүрэн