Тувагийн тэргүүн Шолбан-Кара-оол коронавирусийн халдвар авч эмнэлэгт хэвтсэн тухайгаа "ВКонтакте" олон нийтийн сүлжээн дэхь хуудсаараа дамжуулан тавдугаар сарын 25-нд мэдээлжээ. 

Түүнтэй хамт Тандагийн захиргааны дарга зэрэг өөр хэд хэдэн албан тушаалтан эмнэлэгт хэвтсэн гэнэ. 

"Аймшигтай халдвар юм, толгой маш их өвдөж байна, зарим хүмүүсийн уушги үрэвссэн гэнэ. Манай эмч нар маш их хичээж байна. Эрт орой хэзээ нэгэн цагт миний өвчний талаар ил болно гэдгийг мэдэж байна, гэхдээ алсын зайнаас удирдах ажлаа явуулахыг хичээж байна" хэмээн Кара-оол бичжээ. Мөн Тувагийн Засгийн газрын мэдээлснээр төрийн тэргүүнийх нь биеийн байдал сайн байгаа гэнэ.

Энд дуулгахад, сүүлийн үеийн мэдээллээр өнгөрсөн хоногт Тувад коронавирусийн халдварын тохиолдол 52-оор нэмэгдсэнээр нийт тохиолдол  625 болсон байна. Халдвар анх бүртгэгдсэнээс хойш нэг хүн нас барж, 57 хүн эдгэрчээ.

Г.Бямбасүрэн