Иргэд намрын улиралд ууланд авирч самар түүх нь ихэсдэг. Самар түүж амьдралаа залгуулдаг айл, өрх ч олон бий. Тэгвэл БОАЖ-ын сайд Д.Сарангэрэл иргэд, аж ахуй нэгж байгалийн баялгаа зүй зохистой ашиглах чиглэлд дэмжлэг үзүүлэн ажиллана гэдгээ өөрийн цахим хуудсандаа бичжээ.

Тэрбээр "Самрын их ургацын жил тохиож, Ойн тухай хуулиар үйлдвэрлэл болон ахуйн зориулалтаар самар түүх боломж хушин ойтой 10 аймгийн наймд бий болсон тухай Ойн хөгжлийн төв мэдэгдлээ. Ингэснээр энэ 9-р сарын 10-наас ирэх жилийн 3-р сарын 15 хүртэл иргэд, аж ахуйн нэгж самар бэлтгэх боломжтой болж байна.

Болц нь гүйцсэний дараа самар түүвэл та бүхэн маань модноос унаж эрсдэлд орохгүйн зэрэгцээ хуш модоо хүчтэй түншиж гэмтээлгүй байгалийн баялгаа чөлөөтэй ашиглана. Ялангуяа гал түймрийн аюулаас болгоомжлоорой.

БОАЖЯам КОВИД-ын улмаас эдийн засгийн амаргүй нөхцөлд байгаа үед иргэд, аж ахуй нэгж байгууллагадаа байгалийн баялгаа зүй зохистой ашиглах чиглэлд дэмжлэг үзүүлж ажиллах болно.

Тиймээс та бүхэн маань мэргэжилтнүүдийн судалсан самрын болц гүйцэх 14 хоногийг тэвчээртэй хүлээхийг уриалж байна. Хуш мод маань ойн талбайн тавхан хувийг эзэлдэг. 1990 оноос хойш хайр найргүй хандсаны улмаас 40 хувь нь доройтолд орсон. Одоо л хамгаалахгүй бол хуш мод мөхөх аюултайг ой судлаачид анхааруулж байна" хэмээжээ.