Эрүүл мэндийн яамнаас covid-19 халдварын цаг үеийн нөхцөл байдлын тухай ээлжит мэдээллийг /2021.01.08/ хийлээ. 

НЭМГ-ын дарга Л.Төмөрбаатар:

-Баянгол дүүргийн 5,6-р хорооны нутаг дэвсгэрт Ачтан эмнэлэг болон хэд хэдэн байршилд коронавирус халдварын тохиолдол голомтлон гарсантай холбогдуулаад ХӨСҮТ-ийн зөвлөмжийн дагуу хөдөлгөөний хэсэгчилсэн хязгаарлалтыг өнөө өглөөнөөс буюу 1 сарын 08-ны өдрөөс 11-ний өглөөний  06 цагийн хооронд тогтоолоо. Тандалт шинжилгээ зохион байгуулж байна. Энэ ажилд нийслэлийн болон ЭМЯ-ы харьяа байгууллагын 50 орчим явуулын багийн 300 гаруй эмч мэргэжилтнүүд шинжилгээ авна. Мөн цагдаа, онцгой, тагнуулын байгууллага, мэргэжлийн хяналтын байгууллагын 300 гаруй ажилтан үүрэг гүйцэтгэн ажиллаж байгаа.

Хөдөлгөөний хязгаарлалтад эмнэлгийн тусламж зайлшгүй шаардлагатай хүмүүсийг оруулж гаргах үйл ажиллагаа зохион байгуулж байна. Хүнсний дэлгүүр, эмийн сан хэвийн ажиллаж байгаа. Үүнтэй холбогдуулан нийслэлийн төвийн зургаан дүүрэгт ажиллаж байгаа 27 байнгын үйл ажиллагаатай шинжилгээний цэгүүдийн үйл ажиллагааг цөөлөөд дүүрэг бүрд нэг цэгийн үйл ажиллагааг нээсэн. Дүүргүүдийн шинжилгээний цэгүүдийг танилцуулбал,

• Баянзүрх дүүрэгт 142-р сургууль

• Сонгинохайрхан дүүрэгт 9-р сургууль

• Сүхбаатар дүүрэгт 58-р сургууль

• Хан-Уул дүүрэгт 7-р сургууль

• Чингэлтэй дүүрэгт 39-р сургууль

• Баянгол дүүрэгт 13-р сургуульд тус тус шинжилгээний цэг ажиллаж байгаа. Эдгээр цэгүүдэд зайлшгүй шаардлагатай хүмүүс шинжилгээнд хамрагдана уу?

М.Насан