БНСУ 16 улс, орноос хөдөлмөрийн гэрээгээр ажилтан урьж ажиллуулдаг. Гэвч дэлхий нийтийг хамарсан "Ковид-19" цар тахлын улмаас энэ ажлыг түр зогсоогоод байгаа юм. 

Хөдөлмөр, нийгмийн хамгааллын яамны харьяа БНСУ дахь ХНХҮТ-ийн байранд БНСУ-ын Аж үйлдвэр, хүний нөөцийн хэрэг эрхлэх газрын Гадаад ажиллах хүчний бодлого хариуцсан газрын дарга Ким Сон Жэ зочилжээ. Энэхүү уулзалтын үеэр Монголоос 2021 онд ажиллах хүч авах квотод өөрчлөлт орохгүй, "Ковид-19" цар тахлын нөхцөл байдал намжвал илгээгч 16 улсаас ажилчин оруулж ирэх ажлыг эхлүүлнэ гэдгийг БНСУ-ын талаас мэдээлжээ. 

БНСУ дахь ХНХҮТ-ийн байранд БНСУ-ын Аж үйлдвэр, хүний нөөцийн хэрэг эрхлэх газрын Гадаад ажиллах хүчний бодлого хариуцсан газрын дарга Ким Сон Жэ "Одоогоор илгээгч 16 орноос гэрээт ажилтан хүлээн авах боломжгүй байна. Тун удахгүй нөхцөл байдал сайжирч үйл ажиллагаа жигдэрнэ гэж найдаж байгаа. Хилээр нэвтрэх зөвшөөрлийн хугацааг манай газраас хэлэх боломжгүй. БНСУ-ын Засгийн газар, Халдварт өвчин судлалын үндэсний төвөөс бидэнд чиглэл өгнө. Улс орон бүрт квот олгодог. Энэ жил квотын тоонд өөрчлөлт ороогүй, хэвээрээ байгаа.

БНСУ-д одоогийн байдлаар хөдөлмөр эрхлэх зөвшөөрөл олгох тогтолцооны дагуу Монгол Улсын 5200 гаруй гэрээт ажилчин ажил хөдөлмөр эрхэлж байна. Жил бүр 2000 гаруй гэрээт ажилтан шинээр авч ажиллуулдаг ч коронавирусээс болоод шинээр гэрээт иргэдийг хүлээн авч чадахгүй байгаа. Өмнөх жилүүдэд гадаадаас 52 мянган ажиллах хүч оруулж ирдэг байсан бол өнгөрсөн жил 6000 иргэнийг л урьсан. Коронавирус намжвал Монгол улсаас төдийгүй илгээгч 16 орноос хөдөлмөрийн гэрээт ажилчдыг хурдан татаж авах тал дээр хичээнгүйлэн ажиллаж байгааг уламжилъя" гэв. 

Мөн Солонгос ажил олгогчид илгээгч 16 орноос Монгол Улсын иргэдийг авч ажиллуулах хүсэл, сонирхол ихтэй байдаг. Учир нь Монгол залуус ажилсаг, хөдөлмөрч, эрүүл чийрэг, хурдан шуурхай, Солонгос залуусыг бодвол хүч чадалтай ажиллах хүч хэмээн ажил олгогчид ам сайтай байдгийг тэрбээр онцоллоо. 

Г.Сүрэн