Улаанбаатар хотын хэмжээнд хоёрдугаар сарын 23-наас коронавирусийн халдвараас урьдчилан сэргийлэх вакцинжуулалтыг эхлүүлсэн. Гуравдугаар сарын 12-ны өдрийн байдлаар 44 цэгт 97 баг 600 гаруй хүний бүргэлдэхүүнтэй ажиллаж нийт 84017 хүнийг халдварын эсрэг вакцины эхний тунд хамруулсан байна.

ХӨСҮТ-ийн албаны дарга О.Дашпагма "Нийт вакцинд хамрагдсан хүмүүсийн 44.8 хувьд халуурах урвал илэрч байна. Шинж тэмдэг 2-3 хоног үргэлжлээд арилж байгаа. Хэрэв танд халуурах, толгой өвдөх зэрэг эмнэлзүйн шинж тэмдэг удаан хугацаанд үргэлжилбэл эмнэлэгт хандахыг зөвлөж байна. Эхний тунд хамрагдсан хүмүүс тайвшрах болоогүй. Хоёрдахь тунг хийлгэсний дараа 7-14 хоногийн дараа танд дархлаа бүрэн тогтох учраас өөрийн эрүүл мэндийг хамгаалах зайлшгүй шаардлагатай байгааг анхааруулъя. Энэ долоо хоногт хөдөлгөөнт хүн ам буюу худалдааны салбарт ажиллаж байгаа, хамгийн олон хүнд үйлчилж, харьцдаг хүмүүсийг вакцинжуулна" гэж мэдээллээ.

Вакцины эхний тунг хийлгэсэн иргэд хоёрдахь тунг тариулах хугацаа дөхөж байгаа. АстраЗенека вакцины хоёрдахь тунг 28 хоногийн дараагаас хийх тухай мэдээлж байсан ч ДЭМБ-ын зөвлөснөөр найман долоо хоногийн дараа эхлүүлэх болсныг ХӨСҮТ-ийн албаны дарга О.Дашпагма хэллээ. Мөн энэ вакцины дархлаажуулалтыг дэлхийн зарим улс, оронд түр зогсоосон ч ДЭМБ-аас вакцинжуулалтыг үргэлжлүүлэхийг уриалжээ. 

Монгол Улс вакцинд хамрагдах ёстой хүн амийн 12 хувийг дархлаажуулах хэмжээний вакцин хүлээн аваад байна. 

Г.Сүрэн