Сургуулиуд дэргэдээ сэтгэл зүйч ажиллуулах хүсэлт ихээр ирүүлж байгаа учир БШУЯ-ны төлөөлөл Монголын сэтгэл зүйчдийн нийгэмлэгийнхэнтэй уулзаж санал солилцжээ.

Монголын сэтгэл зүйчдийн нийгэмлэгийнхэн сурагчдын дунд хэд хэдэн судалгаа явуулсан байна. Судалгааг гарааны болон барины үнэлгээгээр дүгнэжээ. Мөн сонгосон сургуулиудад сэтгэл зүйч ажиллуулан үр дүнг ч тооцсон байна. Энэ бүх дүгнэлтээс харахад 11-13 насныхан сэтгэл зүйчид хандах нь түгээмэл буюу 47 хувьтай байжээ. Бусад насны сурагчдын 20 хүртэл хувь нь л сэтгэл зүйчээс зөвлөгөө авсан байна. Мөн зөвлөгөө авсан кейсүүдийг ангилж үзвэл 74 хувьд нь гэр бүлийн шинжтэй ямар нэгэн сэтгэл зүйн дарамт учирсан байжээ. Энэ нь сурагчдын амжилтад муугаар нөлөөлсөн гэж дүгнэсэн байна.

Иймд сургууль бүрт сэтгэл зүйч ажиллуулах боломж хомс байгаа учир дундын шийдэл олох ажлын хэсэг байгуулжээ.

МУИС-ийг 1992 оноос хойш сэтгэл зүйч мэргэжлээр 600 орчим оюутан төгсөн гарсан бол тэдний 50-55 хувь нь өнөөдөр мэргэжлээрээ ажиллаж байна. Харин МУБИС-ийг энэ мэргэжлээр 2200 орчим оюутан төгсөж тэдний 36 хувь нь мэргэжлийн ажлаа хийж байгаа аж.