Коронавирусийн өдөрт илрэх халдварын тоо 300 руу дөхөж байна. Өчигдөр гэхэд 285 хүн халдвартай нь батлагдав. Зөвхөн нийслэл бус 12 аймагт халдвар илэрч, улс даяар хүрээ нь тэлэгдсээр байна. Эрүүл мэндийн байгууллагаас өдөр бүр шаардлагагүй тохиолдолд гадуур явахгүй байхыг, олноороо бөөгнөрөхгүй байхыг захиж, сануулсаар буй. Гэвч иргэд энэ анхааруулгыг үл тоосоор байна.

Чингисийн талбайд өчигдөр 1000 гаруй хүн цугласан мэдээлэл бий. Шүүгчдийн хууль бус үйл ажиллагааны эсрэг гэх энэ цуглаанд ирсэн хүмүүс. Гэвч ямар зорилготой, юуны жагсаалд ирснээ мэдэхгүй хүмүүс ихэнх нь байлаа. Юун жагсаалд оролцож байгааг нь тодруулсан сэтгүүлчийн асуултад “Мэдэхгүй, зүгээр л харж байна, зогсч байна” гэсэн хариулт өгсөн хүмүүс. Ямар ч зорилгойгүйгээр салхилж яваа мэт. Гэвч одоо олон хүн бөөгнөрсөн газраар салхилж явах цаг үе биш. Аль болох олны хөлөөс дайжих нь эрүүл мэнд, амь насаа хамгаалах нэг арга.

Удаан хугацаанд хөл хорионд орж, гэртээ суусан хүмүүсийг буруутгах аргагүй ч халдварын эрсдэл айл бүрийн  хаалганд тулчихаад байгааг иргэд ухамсарламаар байна. Өрөөлийг бус гэхэд ядаж өөрийнхөө эрүүл мэнд, гэр бүлийн хүмүүсийнхээ амь насыг хамгаалмаар байна. Зөвхөн амны хаалт, гарын бээлий халдвараас хамгаалахгүй гэдгийг бид мэднэ. Хэрвээ энэ хамгаалалт болдог бол халдвар өдөрт хэдэн зуугаараа бүртгэгдэхгүй шүү дээ. Учир нь бид аль хэдийнэ амны хаалттай дасал болж, толгойтой бүхэн минут тутам хэрэглэж байгаа.

Та эрүүл мэндээ, амь насаа хайрлаж, хамгаалчихвал таны ойр орчимд байгаа мянган мянган хүн хамгаалагдаж буй гэсэн үг. Учир нь халдвар таныг тойрохгүй. Та халдвар авбал гэр бүл, үр хүүхэд, хамт ажиллагсад, ойртож харьцсан бүхэн өвчилнө. Цаашлаад тэдний гэр бүл, ойр орчмынхон гээд гинжин хэлхээгээр тэлсээр өнөөдөр Улаанбаатарыг бүхэлд нь бүрхсэн. Одоо орон нутаг руу хүрээгээ тэлж байна. Хэн ч, хаанаас ч халдвар авч болзошгүй цаг үе, нөхцөл байдал бий болсон гэсэн үг.

Тэгэхээр та элдэв жагсаал цуглаанаас хол байж, эрсдлээс өөрийгөө хамгаалаарай. Мэдээж, таны үг хэлэх, үзэл бодлоо илэрхийлэх эрхийг хэн ч хязгаарлахгүй. Энэ таны Үндсэн хуулиар олгогдсон эрх. Гэхдээ таны үзэл бодлоо илэрхийлэх, үгээ хэлэх, эвлэлдэн нэгдэх эрхээ хойш нь тавьсан тэр мөч эрүүл мэнд, амь насыг чинь хамгаалах боломж ч болох юм билүү.

Нийгэмд, улс төрд, амьдралд болж бүтэхгүй олон асуудал бий. Тэр бүхэнд таны оролцоо чухлыг үгүйсгэхгүй. Магадгүй та үгээ хэлснээр, үзэл бодлоо илэрхийлснээр, жагсаж цугласнаас асуудлыг шийдвэрлэж болно. Гэхдээ та жагсаал цуглаанд очих үнэхээр шаардлагатай юу гэдгийг гэрээсээ гарахын өмнө нэг бодож үзээрэй. Яг одоо цаг нь мөн үү гэдгийг тунгаагаарай. Мөн зүгээр сонирхож эсвэл юунд очиж байгаагаа мэдэхгүй, зорилгогүйгээр олны хөл рүү бүү яваарай. Таны амьсгалж буй агаар, зогсч сууж буй орчин бүхэлдээ халдварын голомт болсон гэдгийг мартаж болохгүй.

Танаас таны гэр бүл, үр хүүхэд, эргэн тойрны хүмүүсийн эрүүл мэнд, амь нас шалтгаална. Цаашлаад миний эрүүл мэнд таны гарт байна. Та бид салшгүй гинжин хэлхээтэй халдварын голомтод ажиллаж, амьдарч байна. Аминдаа хайртай байна уу! Сайхан цаг мөдхөн ирнэ.

В.Бат