Монгол Улсын нутаг дэвсгэр дээгүүр дайран өнгөрөх, "Сила-Сибир-2" хий дамжуулах хоолойн үргэлжлэл болох "Союз Восток" магистрал хий дамжуулах хоолойн барилгын төслийн техник-эдийн засгийн судалгааг баталсан талаар "Газпром" мэдээлжээ.

"Техник-эдийн засгийн судалгааны хүрээнд төслийн техник-технологийн үндсэн үзүүлэлтүүдийг боловсруулсан. Тэр дундаа, Монгол Улсын нутаг дэвсгэр дээгүүр хий дамжуулах хоолой дайран өнгөрөх зохист чиглэл, түүний урт, диаметр, ажлын даралт, шахагч станцуудын тоог тогтоолоо. Төслийн үзүүлэлтийн урьдчилан тооцооллын үзүүлэлтүүдээс төслийг үргэлжлүүлэх нь эдийн засгийн үр ашигтай гэж харагдаж байна" хэмээн Газпромын мэдэгдэлд өгүүлсэн байна.

Тус компанийн мэдээлснээр, хөрөнгө оруулалт болон ашиглалтын зардлын нарийвчилсан тооцоог багтаах, "Союз Восток" хий дамжуулах хоолойн барилгын төслийн техник-эдийн засгийн үндэслэл оны эцэс гэхэд боловсруулагдсан байх гэнэ. Энэ техник-эдийн засгийн үндэслэлийг "Союз Восток" магистрал хий дамжуулах хоолойн барилгын төслийн судалгааны ажил явуулах болон ТЭЗҮ боловсруулах зорилгоор 2021 оны эхээр Монголд бүртгэгдсэн "Газопровод Союз Восток" компани гүйцэтгэх аж. 

Эргэн сануулахад, "Газпром" болон Монголын Засгийн газар харилцан ойлголцлын санамж бичгийг 2019 оны 12 дугаар сард байгуулж байв. Үүний хүрээнд хамтарсан ажлын хэсэг байгуулсан бөгөөд ажлын хэсгийн 2021-2022 оны үйл ажиллагааны төлөвлөгөөг 2021 оны гуравдугаар сарын 11-ний өдөр баталсан юм. 

Г.Бямбасүрэн