МАН-ын Хяналтын ерөнхий хороо хуралдлаа. Хуралдаанаар УИХ-ын гишүүн Ц.Анандбазарын асуудлыг хэлэлцсэн байна. Ц.Анандбазар гишүүн ажлын байрны бэлгийн дарамт үзүүлэх асуудалд холбогдож, иргэн Б.Сүндэръяа хуулийн байгууллагад гомдол гаргасан. МАН-ын дарга У.Хүрэлсүх өчигдөр ТВ9 телевизэд өгсөн ярилцлагынхаа үеэр УИХ-ын гишүүн Ц.Анандбазартай холбоотой асуудалд УИХ-ын гишүүний бүрэн эрхээсээ түдгэлзээд шалгуулах нь зүйтэй гэсэн байр суурийг илэрхийлсэн юм. Үүнтэй холбоотойгоор МАН-ын Хяналтын хороо хуралдаж, Ц.Анандбазарыг МАН-ын гишүүнээс түдгэлзүүлэх шийдвэр гаргажээ.

МАН-ын дүрэмд Хяналтын Ерөнхий Хороо намын дүрмийн биелэлт, боловсон хүчний бодлогын хэрэгжилт, намын байгууллагын санхүү, аж ахуйн үйл ажиллагаанд хяналт тавихаас гадна намын гишүүдээс гаргасан гомдлыг хянан шийдвэрлэх, нам, түүний гишүүдийн нэр төрийг хамгаалах, намаас төрийн болон намын удирдах албан тушаалуудад санал болгож сонгогдож, томилогдсон гишүүдийн ёс зүйн зөрчлийг шалгаж дүгнэлт гаргах зэрэг эрх үүрэгтэй юм. 

Н.Нягт