Анагаах ухааны доктор Д.Мандахнаран вакцины тухай зарим асуултад хариулт өглөө.

-Хөхүүл эмэгтэйчүүд вакцин хийлгэж болох уу?

-Судалгаанд хөхүүл эмэгтэйчүүдийг хамруулаагүй. Гэхдээ Хятадын өвчний хяналт, сэргийлэлтийн төв ямар ч вакциныг хөхүүл эмэгтэйчүүд хийлгэж болно гэдгийг өөрийнхөө албан ёсны мээдэлэлдээ бичсэн байдаг. Мөн вакцин хийлгэсний дараа жирэмсэн болсноо мэдсэн бол таслах шаардлагагүй гэсэн зөвлөмж бий.

-Вакцин хийлгэсний дараа сарын тэмдгийн мөчлөг өөрчлөгдлөө гэсэн таамаг байна. Ийм нөлөөлөл байх уу?

-Судалгааны үр дүнд тийм зүйл дурдагдаагүй. 

-Вакцин хийлгэснээс хойш толгой өвдлөө гэсэн зовиуртай хүмүүс байна. Энэ өвдөлт хэд хоног үргэлжлэх үү?

-Ихдээ 14 хоног үргэлжлээд зүгээр болох ёстой.

-Вакцин хийлгэснээс хойш даралт байнга нэмэгддэг боллоо гэсэн асуултад ямар хариулт өгөх үү?

-Сэтгэл санаатай холбоотой урвалууд бүртгэгдэж байна. Вакцин хийлгэсэн гэж бодохоор зүрх дэлсэх ч юм уу, дотор эвгүйрэх тохиолдол байна. Хэрвээ даралт ихсэж байгаа бол бууруулах арга хэмжээг авах хэрэгтэй. 

-Вакцины хариу урвал гэж юу вэ?

-Хариу урвал, урвал хүндрэл гэж хоёр өөр үйл явц. Хариу урвал вакцин хийлгэснээс хойш 7-14 хоногт хөнгөн илрээд арилна. Харин энэ хугацаанаас удаан үргэлжилж, хүндэрсэн тохиолдолд урвал хүндрэл гэсэн үг. Энэ бол маш цөөн бөгөөд эмнэлгийн байгууллагад хандах ёстой. Харшлын урвал бол эхний 15 минутад илэрдэг. Синофарм вакцинд харшлын урвал бүртгэгдээгүй. 

В.Бат