Дэлхий дахиныг бүрхсэн коронавирусийн цар тахал намжилгүй, улс орнууд халдварын тархалтыг тогтоон барих зорилгоор төрөл бүрийн хязгаарлалтын арга хэмжээ авч хэрэгжүүлсээр байна. Цар тахал гарснаас хойш дэлхий даяар олон арга хэмжээ цуцлагдаж, хойшлогдож байсны нэг нь Токио-2020 олимп юм. Нэг жил хойшлогдон, энэ зун болохоор товлогдсон Олимпын наадмыг зохион байгуулахгүй байхыг Японы иргэд уриалж байгаа ч Олимп зохион байгуулах хороо дэлхийн хэмжээний спортын наадмыг зохион байгуулах ажлаа эрчимтэй явуулсаар байна. 

Тус улсад Олимпын бамбар буухиалах аян гуравдугаар сарын 25-ны өдөр Фукушимад эхэлсэн бөгөөд тавдугаар сарын 15-ны өдөр Симанэ мужид хүрчээ.

Бамбарыг урлаг, спортын нэрт зүтгэлтнүүд, олны танил хүмүүс буухиалан явж байгаа бөгөөд Японы мужуудаар аялах энэ бамбарын буухианд монгол залуу оролцохоор болсон байна. Тодруулбал, "Тоттори Жёохокү" ахлах сургуулийн багш, сумо бөхийн дасгалжуулагч Р.Гантөгсийг бамбар буухианд томилсон талаараа Тоттори мужийн эрх баригчид мэдэгдсэн байна. 

Эргэн сануулахад, Токиогийн олимп хойшлогдож байгаа талаар 2020 оны гуравдугаар сарын 24-ний өдөр Олон улсын олимпын хороо мэдэгдэж байлаа. Ингэснээр Токио-2020 онц байдлаас болж хойшилсон анхны олимп, тэгш бус онд тохиож байгаа анхны олимп болсон юм.

Г.Бямбасүрэн